Sån la ávon, Solum girjjealmmudagá dåjmadiddje, Else Krogh-Hansen.
– Aktisattjat sáme åhpadiddjij Ájluovta skåvlån, Divtasvuonan galggap dahkagoahtet oahppamnævojt vaj julevsáme skåvllåmáná galggi oadtjot ådå oahppamnævojt ietjasa giellaj, ja gånnå vuodo oahppamnævojda la julevsáme birás.
- Lågå aj:
Juollodij
Åvdep vahko juollodij Sámedikkeráde badjel vihtta millijåvnå dán stuorra oahpponævvoprosjæktaj gånnå gietjav oahppogirje, barggogirje, åhpadiddjijbagádusá ja næhttaviehkke sihke oahppijda ja åhpadiddjijda galggá dagáduvvat.
Julevsáme oahppe ánssidi oahppamnævojt sæmmi láhkáj dagu oarjjelsámeoahppe, oahppamnævo man vuodo l julevsáme birás, javllá Solum girjjealmmudagá dåjmadiddje.
– Dan diehti aktijvuodav váldijma Ájluovta skåvlåjn gulátjit jus la máhttelis aktisattjat barggat dagátjit oahpponævojt julevsámegielaj mánájskåvlådásen sæmmiláhkáj majt lip juo dahkam sulálasj oahppamnævojt oarjjelsámegielaj, subtsas Solum girjjealmmudagá julevsámegiela åvdåsvásstediddje ja dåjmadiddje Else Krogh-Hansen.
- Lågå aj:
Moadda gielajda
Solum girjjealmmudahka la juo 1993 rájes barggam sáme oahppamnævoj ja la dahkam oahppamnævojt sihke nuortta- ja oarjjelsámegiellaj, ja dárogiellaj hiebadum sáme mánájda.
– Almmudagá profijlla la dahkat girjijt ij dåssju dárogiellaj, lip aj dahkam oahppamnævojt gielajda ma gulluji udnásj ådåájggásasj Vuonarijkan dagu somali, durkka ja urdu gielajda.
Ja Krogh-Hansen mielas le luondulasj sámegielajt aj vuorodit gå oahppamnævo galggi dagáduvvat.
– Gájka beras lulu oadtjot girjev ietjas giellaj, ij galga gatjálvis jus lulu moattes vaj ælla, dat la ájnas ulmme girjjealmmudahkaj, dættot Krogh-Hansen.
- Lågå aj:
Álkke juollodit
Ja Sámedikkerádáj ij lim gássjelis juollodit rudájt girjjealmmudahkaj, subtsas sámedikkeráde Silje Karine Muotka.
– Lip viehka sihkar almmudagán le dat máhtudahka ja tjiehpesvuohta dahkat girjijt sámegiellaj, jus ga almmudahka le dáttja girjjealmmudahka. Julevsámegielan ettjin boahtám nav ållo åhtsåmusá, e ga sámegielak girjje almmudagájs, javllá Muotka.
- Lågå aj: