Mii dáhpáhuvvá dáid beassážiid?

Les saken på norsk.

«Beassášmárkanat Guovdageainnus, sámi stuorámus beassášdoalut», dajahallá Boŋggu Ánte, ja dat gal dáidá doallat deaivása.

Eanáš beassášdoalut Sámis lágiduvvojit Guovdageainnus, muhto mii leat gávdnan vel muhtin beassášdoaluid eará guovlluin Sámis.

Lávvardaga 01.04 🐥

• Mihá konsearta Hábmeris

Mihá kulturfestivála álggahuvvo jo mánnodaga njukčamánu 27.b, ja loahpaha festivála konsearttain Lávvardaga. Doppe čuojahit earret eará Ola ja Lars Bremnes, Lávre ja Ronja K. Larsen.

Gos: Æventyrsalen

Eambbo dieđut.

• Gakšu filbma- ja dáiddafestivála

Sirpmá gilisearvi bovde ođđa beassášdáhpáhussii, Gákšu filbma- ja dáiddafestiválii, gos beasat vásihit dáiddačájáhusa, filbmačájáhusaid ja juoiganeahkeda – ja dáppe gávdnojit doalut mat heivejit buohkaide. Festivála rahppo dáiddačájáhusain cuoŋománu 1. beaivvi, ja loahpahuvvo juoiganeahkediin skilleduorastaga, cuoŋománu 6. beaivve.

Gos: Sirpmá Giliviesus

Eambbo dieđut.

Pálbmasotnabeaivvi 02.04 🐣

• Monneohcan Snåases

Mátta-Sámis álggahit beassážiid monneohcamiin. Breide gilis olggobealde Snåase lágida SnåsaEvents monneohcama. Mánát geat leat 5+ ohcet moniid miehta márkana, dan botta go mánáin gaskkal 0-5 lea sierra guovlu gos ohcet. Lágideaddjit lohpidit olu vuoittuid maid vuorbádit daid gaskkas geat gávdnet moniid.

Gos: Hyllan Hjemmebakeri

Eambbo dieđut.

• Vasarløpet 2023 Jávremohkis

Dá lea vejolašvuohta sportys olbmuide álggahit beassážiid čuoigamiin. Vasarløpet lágiduvvo jahkásaččat Jávremohkis, Ivgu suohkanis, ja lea okta Romssa boarráseamos čuoigamiin. Dás lea vejolaš searvat sihke gilvočuoigamiidda ja bearaščuoigamiidda.

Gos: Jávremohkis

Eambbo dieđut.

• Oaggungilvu Geatkkutjávrris

Oaggungilvvut ja beassážat mannet giehtalaga, ja lágiduvvojit miehta Sámi. Nordreisa scooter og båtforening lágida oaggungilvvus Geatkkutjávrris, Ráissas miellahtuide. Doppe lea fidnemis ruhtavuoitu stuorámus, nubbin stuorámus ja unnimus guliide. Dasa lassin gessojuvvo maid vuoitu bileahtaid gaskkas.

Gos: Geatkkutjávrris

Eambbo dieđut.

Disdaga 04.04 🐰

• Beassášávvudeapmi Musseres

Vefsn musea Musseres lágida beassášávvudeami bearrašiidda. Doppe lea vejolaš ráhkadit iešguđegelágan beassáščiŋaid, borrat beassášnjálgáid ja searvat gelddolaš beassášrebusii.

Gos: Vefsn museas

Eambbo dieđut.

• Beassášgažus Praahkes

Jus háliidat iskat máhtolašvuođa de sáhtát fitnat beassášgahčosis Praahkes, Rosse gielddas. Doppe guossohit laejpie márffiin ja juhkamuša.

Gos: Såmmårfjøset

Eambbo dieđut.

Gaskavahkku 05.04 🥚

• Festiválarahpan Guovdageainnus

Guovdageainnu beassášmárkanat rahppojit almmolaččat gaskavahkku, ja dalle rahppojit nai čájáhusat gilišiljus. Almmolaš rahpama maŋŋel lágiduvvojit olles golbma konsearta, gažus ja teáhterčájáhus.

Gos: LávvuLávddis

Eambbo dieđut Guovdageainnu beassášprográmma birra.

Skilleduorastaga 06.04 🌞

• Sydisdánsun Guovdageainnus

Lea šaddan árbevierru ahte Sámi ofelaččat lágidit sydisdánsunkurssa skilleduorastaga, ja nu dahket dán jagi maid. Kurssas oahpat vuođđolihkastagaid sydisdánssas vai beasat bures šleaŋggáhallat konsearttain. Kursa lágiduvvo dii 15:30-16:00.

Gos: Diehtosiiddas

• Beassášfeasta Raarvihkes

Raarvihkes šaddá buorre mokta go Fjellspretten gammeldansklubb bovde beassášfestii. Feasttas čuojaha Pikesjau bánda ja doppe guossohuvvo alkohola, gáffe ja juoga maid sáhttá borrat.

Gos: Fjellspretten

Eambbo dieđut.

• Skádja club nuoraide Guovdageainnus

Skádja Club lea Davvi Divisiona alkoholkeahtes klubbakonseapta nuoraidskuvllaagi nuoraide. Dán jagi čuojaha DJ Sávza seta, ja lágideaddjit lohpidit buori musihkas ja albma klubbaviba. Konsearta bistá dii 22:00-00:00.

Gos: Davvi Division

• Konsearta Kárášjogas

Kárášjogas lágiduvvojit moadde konsearta dáid beassážiid, ja vuosttáš dáin lea skilleduorastaga. Dalle čuojahit Katarina Barruk, Violet Road, BITI ja ArOn & Gaaseby.

Gos: Niitohárjjis

Eambbo dieđut.

Guhkesbearjadaga 07.04 🐰

• Konsearta NRK Juŋkkáin Guovdageainnus

Maiddái guhkesbearjadaga lágiduvvo konsearta nuoraid varas. Dalle lea konsearta LávvuLávddis ja NRK Juŋká boahtá beassášhangout:ai mas čuojahuvvo kulas DJ-seta. Sáhtát dál jo ráhkkanit ja guldalit sin ođđa lávlaga Skuter Lavvo & Bensin! Konsearta bistá dii 22:00-00:00.

Gos: LávvuLávdi

• Juoigankonsearta mánáide Guovdageainnus

Juoigankonsearttat gullet beassážiidda, ja guhkesbearjadaga lágiduvvo juoigankonsearta gos mánát leat násttit. Konsertii ii dárbbat dieđihit ovdagihtii ja lea maid nuvttá. Konsearta lágiduvvo dii 14:00-15:00.

Gos: Davvi Division

• Skaidicrossen 2023 Skáiddis

Hammerfest Racing Clubas livčče hállu ahte sin skohtercrossa šaddá beassášárbevierru olusiidda. Danin sii lohpidit albma álbmotfeasta leavttuin, gealdagiin ja gilvvuiguin buohkaide.

Gos: Skáiddi guolbanis

Eambbo dieđut:

• Bearaš- ja nuoraidkonsearta Kárášjogas

Kárášjogas lágiduvvo maid konsearta bearrašiidda ja nuoraide. Konsearttas čuojahit R & GM, ArOn & Gaaseby ja BITI.

Gos: Niitohárjjis

Eambbo dieđut.

• Stand up talkshowa Guovdageainnus

Jus háliidat reaškit dáid beassážiid de berret fitnat stand up talkshowas Erlend Eliasiin ja Sindre Olav Fredriksenain LávvuLávddis. Talkshowa bistá dii 19:30-21:00.

Gos: LávvuLávddis

Beassášlávvordaga 08.04 🐤

• Heargevuoddjimat Guovdageainnus

Eai leat beassážat jus heargevuoddjimat eai lágiduvvo. Dán jagi lágiduvvojit árbevirolaš heargegilvovuodjimat reagain Gorovuohpis, Guovdageainnus. Heargevuodjimiid oktavuođas lágiduvvojit maid njoarostangilvvut. Heargevuoddjimat lágiduvvojit dii 11:00-15:00.

Gos: Gorovuohpis

• Kara-X Kárášjogas

Kara-X lea guovddáš oassi sámi beassášávvudeamis, ja maiddai dán jagi lágiduvvo skohtercrossa. Crossas lea ruhtavuoitu buot klássaide, ja lágideaddjit lohpidit leavttu ja gealdaga.

Gos: Stadioncrossas

Eambbo dieđut.

• Sámi Grand Prix 2023

Sámi stuorámus musihkkagilvu lágiduvvo nu go dábálaččat beassášlávvardaga Báktehárjjis. Jus it oro joavdame gitta Guovdageidnui dáid beassážiid de sáhtát geahččat SGP-sáddaga NRK1 kanálas dii 19:50 rájes.

Gos: Báktehárjjis

Eambbo dieđut.

• Afterski-konsearta Skáiddis

Jus háliidat Afterski-dovddu Finnmárkkus de ii dárbbat vuolgit dobbelii go Skáidái, Hámmerfeasta suohkanis.Skaidi festivalen lea beanta ođđa beassášfestivála mii lágida olu iešguđegelágan doaluid. Festivála loahpahuvvo konsearttain mas HEDEGAARD, Rikke Darling ja Danim čuojahit.

Gos: Skáiddis

Eambbo dieđut.

Vuosttáš beassášbeaivvi 09.04 🐇

• BeassášJam Guovdageainnus

It go leat vel dolkan ávvudeames beassážiid? Ále fuola! BeassášJam lea árbevierru mainna loahpahit beassášmárkaniid Guovdageainnus. Jus ii leat vel jietna nohkan konsearttaid maŋŋel de lea doppe vejolaš lávlestit dahje juoiggastit. Lágideaddjit lohpidit ahte soitet vel muhtin čiegus artisttat iđistit. Beassášjamma lágiduvvo dii 22:00-02:00.

Gos: Thon Hoteallas Guovdageainnus