Kárášjoga sabetnjuikejeaddji guoktá Ole Máhtte Sara Nedrejord ja Lemet Johanas Nystad oasálasteba nuoraid norggameašttirgilvvuin dán vahkkoloahpa.
Eaba lihkostuvvan ikte
Ii goabbage Kárášjoga njuikin lihkostuvvan ikte. Ole Máhtte Sara Nedrejord oláhii 22. sáji sihke dábálaš- ja stuora njuikehagas. Dábálaš njuikehagas oláhii son 83 ja 85 mehtára, ja stuora njuikehagas ges 119,5 ja 122 mehtára. Lemet Johanas Nystad oláhii 38. sáji dábálaš njuikehagas ja 53. sáji stuora njuikehagas.
Nystad ii beassán njuiket go vuošttáš vuorus go lei vissis mihtomearri go galgá beassat nuppi vuoru njuiket.
Odne šaddá somá joavkonjuikemis
Kárášjoga njuikejeaddji guovttos beassaba odne njuiket fárrolaga Álttá nieidanjuiki, Anna Odine Strøm. Strøm oláhii silbba ivttá nuoraid norggameašttirgilvvuin. Ole Máhtte Sara Nedrejord lohká šaddat somá go leaba oččon nieidda iežaska jovkkus njuiket. Sii golmmás njuikejit Finnmárkku ovddas nuoraid joavkonjuikemis odne Granåsen luohkás, Troandimis.
Ole Máhtte muitala ahte sin joavkkus ii leat nu stuora vuordámuš otná gilvvus, muhto lea somá go sis Finnmárkkus lea joavku maid joavkonjuikemis.
Gula Ole Máhtte Sara Nedrejord: