NRK Meny
Normal

Mexico lea su nubbe ruoktu

- Sus leat guokte ruovttu, Kárášjogas ja Mexicoas. Muhto leat Mexico liegga sáttogáttit mat eanemusat geasuhit, dovddaha kárášjohkalaš Lill Tove Lindi.

Lill Tove Lindi

Go Lill Tove Lindi vuos boahtá Kárášjohkii, de sus leat mánga barggu hávális seastindihte ruđa vai fas beassá dollet máilbmái.

Foto: Brita Åse Norlemann / NRK

– Manne? Na, mun liikon lieggasii! Beaivvádaga ja sáttogáttiid. Doppe lea nu “chilla eallin", ii doppe leat doapman ja hušša. Nu čilge 25-jahkásaš Lill Tove Lindi manne juste Mexico nu geasuha su. Son lasiha ahte meksikánárat ja sápmelaččat leat mángga dáfus oalle ovttalágánat.



Máŋga barggu hávális
Maŋŋel joatkkaskuvlla vulggii son johtit máilbmái. Go vuos lei johtán máilmmis, de fuomášii ahte háliida oahppat spánskagiela. Ja nu son gárttai Mexicoai, ja dál lea son juo máŋgii leamaš dan seamma báikkis.

– Dábálaččat lean Kárášjogas jáhkebeale ja Mexicoas dan seamma. Ja go vuos lean Kárášjogas, de válddán máŋga barggu oktanaga vai nagodan seastit ruđa boahtte mátkái. Mus leat leamaš čieža barggu oktanaga, dábálaččat lávejit leat golbma, son muitala.

Dego báikki olmmoš
Ja dál son lohká alddis leat guokte ruovttu, Kárášjohka ja dát unna báikkáš Mexicoas gosa álo áibbaša. Son lea oahppan giela, ožžon oahppásiid doppe ja dovdá ahte su gehččet dego báikki olmmožin dál. Dasa son gal liiko.

– Juo, mus lea gal bearaš Kárášjogas, muhto buot mu skihppárat leat fárren miehtá Norgga. Lea álo somá boahtit Kárášjohkii, muhto vahku maŋŋel badjána miella fas vuolgit, dovddaha Lill Tove.

Ja boahtteáiggis háliidivččii oažžut dálu Mexicoai. Ja Kárášjohkii.
– Niehku livččii sáhttit bargat Mexicoas Norgga bálkkáin.