Čálli: Anna Anita Hætta Guttorm
The Replaceable Heads lea ovddeš Per Ivars Orkestera ođđa namma, earet vokalista ja šuokŋadahkki Per Ivar Jensena, de leat joavkkus maiddái Thomas Hough (gitára), Espen Sandø (bássa) ja Lars Ådne Bevanger (rumbbut). Bevanger lei mielde ráhkadeamen skearru “Glad To Be Happy”, dál lea son fárren Manchesterii ja joavku leage ohcamin sadjásačča. - Sii livčče muđui gergosat vuolgit turneai, muitala Per Ivar Jensen.
Media rámida The Replaceable Heads vuosttaš CDa “Glad To Be Happy”.
Áviisa Nordlys attii árvosáni 5. Anders Dyrkorn Puls-musihkkaaviissas cealká. "The Reaplaceable Heads lea somás deaivvadeapmi garášepunkšáŋŋeriin. Joavku orruge áigumun dáinna viđainnuppelot lávlagiin movttiidahttit guldaleaddjiid".
Neahttabáiki www.mylder.no čállá skearru birra ná: “...Manifestašuvdna dan energiijas, čuojahanmovttas, ja bivastahkes punkrockas mii báitá dego cuvkejuvvon glássa duolva, gáržžes gávpotloavkkuin (gávpotvistešiljuin).”
Ieš lohká ráisalaš Per Ivar Jensen erenoamážit Bázolágániid movttiidahttit su čállit musihka, sii guđet áiggošedje sakka eanet go sii nagodit. Teavsttaid čoaggá Jensen suoskangummepáhkain, mielkepáhkain, čállagiin, filmmain ja ságastallamiin. Son imašta manin muhtumat leat bivnnuhat, ja earát gis dárpmehuddet nissoniiguin, nugo lávlagis “The Man”. Per Ivar Jensen lávlu olbmo árgabeaivveeallima komediijalávlagiin nugo “Skurtreskermaskin”, “Man To A Monster” ja “Sinners Club”.
Media buohtastahttá Per Ivar Jensena lávluma stuorra musihkalaš násttiiguin nugo Joey Ramonein, Rick Simsiin ja Elvis Presleyin, muhto dieđus máŋga oktava badjeleappos. The Replaceable Heads buohtastahtto joavkkuiguin nugo Ramonesiin, Stoogesiin, New York Dollsain ja Sex Pistolsain.
Per Ivar Jensena čilgehus dasa manin joavku molssui nama ovddeš Per Ivars Orkesteris “The Replaceable Heads” –nammii, lea dat go punk ja rockmusihka birrasis navde ahte Per Ivars čuojahii Dance Band musihka. - Diekkár birrasiin dohkkehit dakkár namaid go Turbomotor ja Glucifer, muhto eai fal Per Ivars. Ovttagaskka árvvoštalaimetge bidjat “Hellburners” joavkku namman, leaikkastallá The Replaceable Heads vokalista Per Ivar Jensen.
Oahpásmuva joavkui ja gula sin musihka:
http://www.myspace.com/thereplaceableheads