Mearragátti paradiijas gosa beasat dušše girddi

Sosnievke ássi Sergej Julin ja su nieiddaš leaba doama doama mannamin helikopterseivvohahkii.

Dát rieddjás girdiráhkkanus dat čatná oktavuođa giláža olgomáilmmiin, buktá gálvvuid ja poastta.

– Helikoptera boahtin lea hirbmat dehálaš, go dál dušše dán láhkái oažžut gálvvuid ja eará dárbašiid. Dálvet mun beasan gal skohteriin fitnat Lujávrris, muhto dohko lea 300 kilomehtera, dadjá Julin.

Elrávdnji beali jándoris

Sosnievke-giláš lea Lujávrri gieldda unnimus ássanbáiki. Dáppe orrot birra jagi sullii 20 olbmo. Eatnašat boarraset go 50 jagi.

1990-jagiin dáppe ledje badjelaš čuođi olbmo. Eatnašat fárrejedje Sovjetlihtu luoddaneami maŋŋá go ii lean šat bargu.Skuvla, mánáidgárdi, buohcceviessu ja buvda giddejuvvojedje.

Juohke iđit vuolggaha Andrej Surjadov dieselaggregáhta, mii buktá elrávnnji dáluide 12 diimmu jándoris.

Sosnievkes interneahtta boahtá satelihtaid bokte. Viesuin lea maid televišuvdna.

Olbmot leat hárjánan, ahte dušše beali jándoris lea elrávdnji. Muhtin dáluin lea maid priváhta dieselaggregáhtá.

Ii leat lohpi jogas bivdit

Sergej Julin jođiha dan fitnodaga mii doaimmaha dieselaggregáhta, muhto ovdal son lei guolásteaddji.

– Mis ii leat lohpi bivdit guoli iežamet jogas. In ádde manne mis báikkálaš olbmuin ii leat lohpi bivdit, ii málestanmađege, šuohkiha Julin.

Moskva gávpeolbmot dat láigohit joga ja vuvdet luossabivdomátkiid riggáide.

Jus báikkálaš olbmot áiggošedje bivdit luosa jogas, de fertejit dollet Murmánskii oastit oaggungoartta. Dohko lea masá 500 kilomehtera.

Su mielas lea váttis bealuštit vuoigatvuođaidis go orru «Ipmila sealggeduohken».

– Lean sápmelaš ja dieđán mus leat guollebivdovuoigatvuođat sihke báikkálaš jogain ja mearas. Almmatge lea váttis oažžut virggálaš duođaštusa dasa, go orun guhkkin ert fylkka váldogávpogis.

Vuorddaša fulkkiidis

Sosnievke ássi, penšonista Sergej Jeliseev, lea Ruošša mearraolmmoš. Son lea huksen guossedálu iežas fulkkiidasas.

– Dán dáloža huksejin bártniidasan ja fulkkiidasan, jus dal bohtet guossái. Turisttat eai boađe go lea menddo guhkki ja divrras boahtit deike. Moai eamidiin ean gille fárret gosage. Letne dáppe olbmot ja letne hárjánan dán eallimii, dadjá Jeliseev.

Soapmásat bohtet gal deikke, muhto guollebivdogildosa geažil lea váttis ovdánahttit turismma ja eallima gilážis.