NRK Meny
Normal

Čáppa Máze čáppa govain

Beakkán govvejeaddji Marcel Leliënhof rámida govaid maid ránskalaš Cèline Clanet lea govven Máze gilážis. Govat leat čohkkejuvvon sihke girjin ja govvačájáhussii, ja dát čájáhus lea dál Oslos.

Marcel Leliënhof Celine Clanet govain
Foto: Brita Åse Norlemann / NRK

- Celine Clanet Máze-govat leat erenoamáš čábbát, rámida beakkán govvejeaddji Marcel Leliënhof.

Bures lihkustuvvan
Marcel Leliënhof lea Norggas dovvus govvejeaddji, ja juste dál lea son ovdamearkka dihte fásta govvejeaddji Top Model- nammasaš tv-raiddus, Muhto son maid jođiha The Apartment nammasaš govvagalleriija ovttas Massimo Leardiniiin ja Torgeir Hjetlandain. Sin mihttomearri lea čájehit erenoamáš buriid govvejuvvon govaid. Ja Celine Clanet Máze-govat leat Leliënhofa mielas hirbmat buorit ja erenoamážat.

- Clanet govat leat bures hápmejuvvon, son hui čehpet ávkkástallá luonddu molsašuddi čuovgga ja govat leat hui ráfálaččat. Dain vuhtto ahte olbmot luhttet sutnje, olbmot eai beroš ahte govvejeaddji čuvvoda sin ja dat lea erenoamáš, oaivvilda Leliënhof.

celine clanet govat

Oktiibuot 21 Celine Clanet govain leat dál čájáhusas Oslos.

Foto: Brita Åse Norlemann / NRK


Čájehit erenoamášvuođa
Celine Clanet lea mánnávuođa rájes liikon davvi-Eurohpai, ja lea ieš ollu vánddardan davvi-guovlluin. Ovdal go álggahii govvenprošeavtta Mázes, de son logai ollu sápmelaččaid birra ja oččodii oktavuođaid davvin. Son oainnat ii háliidan leat vuot okta dakkár govvejeaddji gii čájeha dan eksohtalaš sámivuođa mii juo álo oidno poastakoarttain.

- Mun háliidin čájehit osiid mat eai oidno nu dávjá go lea sáhka sápmelaččain. Mun háliidiin erenoamážit čájehit sápmelaččaid oktavuođa lundui ja elliide ja maid áigái. Ja dieđusge háliidiin guovllu ja olbmuid čábbodaga oažžut ovdan, lohká ránskalaš Clanet. Ja son lohká ahte govat šaddet buorebut mađi lagat oktavuohta govvejeaddjis lea birrasii ja olbmuide doppe.

- Ja dál lea Mázelaččat munnje divrras ja lagas ustibat.

Oahppá govain
Marcel Leliënhof oaivvilda Clanet hirbmat bures lihkustuvvan prošeavttain ja lohká ahte maiddái son, lulli dáčča, oahppá olu go geahččá dáid govaid. Son mieđiha ahte ieš maid hálidivčči vuolgit Sápmái govvet ja govvidit sámi birrasiid.

- Muhto dát govat leat nu buorit ahte measta ribahan gáđaštit, leaikastallá Leliënhof. Dál son sávvá ahte olbmot finaše galleriijas ovdal go Máze-govat fas guđđet Norgga ja máhcet ruovttoluotta Ránskii.

Čájáhus lea Sjøgangen 2 nammásaš báikkis cuoŋománu 16.beaivve radjái.