Mathilde Magga (25) lea máŋga jagi leamaš «swiftie», ja lei guhká illudan konsertii mii galggai lágiduvvot Wienis, Nuortariikkas, bearjadaga.
Plána mielde galggai Taylor Swift doallat golbma konseartta oaivegávpogis dán vahkkoloahpa, muhto terroráitaga geažil šluhttejedje eiseválddit konsearttaid.
Golbma nuorra nuortariikkalačča leat váldon giddagassii stuorra politiijaoperašuvnnas Ternitz gávpogis. Sii leat gaskkal 16 ja 19 jagi.
Dasa lassin jáhkket politiijat ahte nubbi 15-jahkásaš gánda lei mielde plánain.
Sullii 65.000 olbmo ledje oastán bileahta juohke konsertii.
– Mun ledjen aiddo ollen oaivegávpogii ja hostellii, go ožžon dieđu ahte konseartta ii šatta. Álggos in áibbas jáhkkán ahte lea duohta, dadjá Magga.
Veahkehii su lossa áiggis
Magga muitala NRK:ii ahte artista lea leamaš dehálaš sutnje lossa áiggis.
Taylor Swift lea maŋimuš jagiid leamašan ovtta máilmmi stuorámus artisttain ja lávluin.
Swifta musihka bokte, beasai Magga isolašuvnna čađa pandemiijaáiggi.
– 2020 lei váttis jahki, muhto go «Folklore»-skearru ilmmai de šattai buot veahá álkibun, ja dan rájes lean duođaid liikon Swiftii, čilge son.
Dušše moadde vahko áiggi son beasai oaidnit su jiellat artistta lávddi alde, Londonis. Mathilde muitala ahte dainna lea lihkolaš, muhto lei dán konsertii masa lei buot eanemusat illudan.
– Dan konsertii ledje mus VIP-bileahtat, vai galgen beassat čuožžut njuolga lávddi ovddabealde.
Mathilde Magga beasai Swifta "máilbmetouras" oassálastit, go Londonis gulai iežas jiellat artistta.
Foto: Priváhta– Suddo muhto áddemis
Vaikko lei beahtahallan go ii beassan dán konsertii, de son ipmirda gal bures ahte Swift ja eiseválddit vuoruhit sihkkarvuođa.
– Livččii leamaš nu issoras jus terrorplánat livčče čađahuvvon, nu ahte lea hui suddo muhto áddemis, dadjá son.
Muhto swiftseaid dát ii áibbas gal bissehan.
Wien gávpoga gáhtaide čoahkkanedje máŋgalot duháha «swiftie» geat lávlo Swift lávlagiid.
– Taylor Swift čuojahuvvo juohke sajis. Rámbuvrrain, geainnu alde ja hosteallas gos mun orun ledje olu earát geat maid áigo konsertii. Mii leat ovttaláhkai movttiidahttán nubbi nuppi dan váivves dilis.
– Lean ožžon olu ođđa ustibiid, in ge leat okto dáppe.
Vaikko ii beassan nuppádassii gullat Taylor Swift konseartta, de Mathilde ii heađástuvvo. Su mielas lea sihkkarvuođa deháleamos.
Foto: PriváhtaMagga ja su ođđa ustibat sávvet ahte ožžot fas vejolašvuođa mannat eará konsertii sus.
– Sáhttá oažžut bileahttaruđaid ruovttoluotta
Sis geain ledje bileahtat konsertii, sáhttá leat vuoigatvuohta oažžut ruđaid ruovttoluotta.
Dan muitala Thomas Iversen, gii lea senior juridihkalaš ráđđeaddi Geavaheaddjiráđis.
– Go konsearta šluhttejuvvo, de lea oassálastiin vuoigatvuohta oažžut fas bileahttahatti ruovttoluotta lágideaddjis, lohká son.
Vaikko ollugat leat golahan máŋga duháha mátkái ja orrumii konseartta oktavuođas, de ii leat sihkkar ahte ožžot ruovttoluotta ruđa dán ovddas.
– Go lea sáhka mátkkošteamis ja idjadeamis, de dát lea juoga mii dábálaččat gokčojuvvo mátkedáhkádusas. Muhto dávjá lea rádji man stuorra supmit gokčojuvvojit dákkár diliin, lohká Iversen.
– Rádji rievdá fitnodagas fitnodahkii geavaheaddjeekonomiija mielde, nu ahte dás fertet ieš dárkkistit iežat fitnodaga, lohká son.
