«Nigá» nammasaš girji lea su goalmmát girji.
Dán vuoro girji lea noveallačoakkáldat. Girjji namma lea Nigá – ja govvádallá sámegándda mánná- ja nuorravuođa dáhpáhusaid 1940-50 logu áigodagas.
– Dien áiggis gárttaimet sihkastit olu bivastagaid, muhto eallin lei lihkká buorre, lohká girječálli, Aikio.
Noveallačoakkáldat leat njealje gillii, nammalassii davvisámegillii, anársámegillii, nuortalaš gillii ja suomagillii.
Sámebearraša duohta eallindáhpáhusat lea vuođđun girjjii 25 noveallain.
Lea ieš eallán Nigá láhkai
Bearaš man govvádallá, háhká birgenlágiset meahcce- ja guollebivddus smávva duottargilážis.
- GULDAL:
Buohkat leat fárus buotlágan doaimmain, maiddái bearraša uhca almmái Nigá. Ná son oahppá buot dáidduid ja dieđuid, maid son boahtá dárbbašit eallimisttis davvin.
Girječálli Jávrri Juhán Niillas lea ieš eallán Nigá láhkai mánná- ja nuorravuođas Buolbmátjávrre meahccegilážis seamma áigodagas.
– Dalle mis eai lean rádiot, telefovnnat, geainnut, eaige biillat. Johtolat lei čuoigga, vázzi, heasttain, herggiin, burruin ja fatnasiin. Ealáhus lei guolle- ja meahccebivdu. Muhtun dálus ledje dasa lassin muhtun gussa ja sávza, son muittaša.
Jáhkká leat váttis olu mánáide ja nuoraide dál áddet mo mánát dološ áiggis duhkoradde.
– Min eallinvuohki ja fearánat leat measta máinnasin sidjiide, lohká Aikio.
NJELJE GILLII: Nigá girji lea čállon sihke davvisámegillii, anársámegillii, nuortalaš gillii ja suomagillii.
Foto: Nils Henrik Måsø / NRKGovvádallá mánnávuođa vásáhusaid
Girjjis máinnaša Nigá vásáhusaid birra earret eará go bivastatgállui duoma duoma ferte gállit muohttaga čađa go eadnái ferte viežžat jorddamovrra.
Muhto maiddái rievssatbivddu, njoammelbivddu, gumpevalvvi, luomeguovžža, goddesáhpán, jávrebivddu, luossabivddu ja eará fearániid birra lohkkit besset vásihit.
– Buot dát leat duohta dáhpáhusat. Iežan 78 jagi eallimis dieđusge lean beassan vásihit vaikko maid. Dalá eallimis galggai olmmoš maid ieš hutkat mo duhkoraddat, ja gárttai bargat iešguđet bargguid dađe mielde go searaiduvai, muittaša girječálli.
Girjji logadettiin lohkki beassá Nigá fárus dakkár áigái ja máilbmái, man son dálá Sámis ii šat muđui fáhte.
Girjji govaid lea Marketta Nilsen sárgon.
