Girji álgá doppe gos mii leat gullan ahte Jon Henrik Fjällgren lohká iežas loaktit buoremusat; meahcis bohccuid luhtte.
Son lea 16-jahkásaš, ja lea láhppon garra dálkin.
Die leage dat fáddá mii lea vuođđun olles girjái, ahte váldoolmmoš álo lea dovdan iežas láhppon ja álo viggame juoga man nu guvlui.
Dát cealkka lea álgosánis, ja dat doallá lohpádusa. Girjjis leat imašlaš ja ilgadis fearánat, álggus gitta lohppii. Ja go jurddaša ahte girječálli lea 33 jagi boaris, de lea ipmirmeahttun ollu maid lohkki beassá diehtit. Gaskkohagaid oalle hirpmahuhtti lohkamuš.
- Loga/Les:
Álkit muitaluvvon
Sátni jag - mun, duođašta ahte lea Jon Henrik Fjällgren ieš gii muitala, ja dahká álkin čuovvut muitalusa. Dáinna lágiin ráhkada son maiddái lagas oktavuođa lohkkiin, ahte lea dego munnje muitaleame, ja dat lea hui buorre.
Ruoŧagiella lea lahka dárogiela, ja danne ii dovdon lossadin lohkat girjji.
Dušše muhtun sajiin vásihan ahte amas sánit bissehit mu ipmirdeames mas lea sáhka, nu go dat oassi mas Jon Henrik muitala ahte lea meahcis ja oaidná amas lotti.
Fertejin neahtas ohcat mii berguv lea dárogillii. Go gávnnahin ahte dies lea sáhka skuolffis, de ipmirdin easka manne lei nu earenoamáš deaivvadeapmi.
Girječálli soaitá válljen čállit mun-hámis ja álkes ruoŧagillii go diehtá ahte son lea dovddus artista maiddái Norggas?
Váttis jáhkkit
Girjjis muitaluvvo nu ollu man in lean vuordán lohkat, ja gaskkohagaid eahpidišgoađán man duohta dát muitalus oba leage.
Muitaluvvo hui dávjá mardrömmaid - deddoma birra. Ja dat dagaha ahte vuorddán lohkat ahte vissis dáhpáhusat eai gusto lean duođat, muhto oassin dain heajos nieguin.
Jon Henrik muitala girjjis ahte sutnje lea muitaluvvon ahte sus leat attáldagat, ahte soapmásat oaivvildit sus seamma attáldagaid go noaiddis. Ja mii lohkat movt ieš fuomáša ahte máhttá čuojahit vaikko makkár čuojanasaid, vuosttaš geahččaleamis juo.
Ovtta konsearttas son ferte geasanasain čuojahit, ja dat manná hui bures. Diekkár oasit imaštahttet dán árvvoštalli, ja dat dagahit ahte mun lohkkin in riekta dieđe galggan go jáhkkit diesa vai in.
Measta manan Youtubii ohcat gávdno go juste diet konsearta doppe, vai beasan gullat movt dat lei.
Ja de leat ges eará dáhpáhusat maid dihte geasán mojiid, nu go dalle go cizážat čohkkedit guldalit su juoigama. Diet oasit čuvggodahttet girjji, mas eanaš oasit leat hui seavdnjadat.
Doalaha lohkki
Girji álgá 16-jahkásaš Jon Henrikain, muhto muđui mii čuovvut su eallima kronologalaččat - mánnávuođas nuorravuhtii, ja de loahpahuvvo 2020:s.
Girjjis leat namahis skuvllat, báikkit ja gávpogat. Olbmuin ii leat goargu, dahje sii leat namaheamit.
Dáinna lágiin sáhttiba girječálli guovttos, earenoamážit Jon Henrik, muitalit movt vásihii seksuálalaš illasteami, givssideami, gárrenmirkkuid geavaheami ja doarrumiid, nu ahte olbmuid identitehta ii almmuhuvvo.
Dovddan ahte livččen háliidan diehtit guđe gávpogii Jon Henrik fárrii go álggii joatkkaskuvlii, go son muitala ahte su gjengas - joavkkus, ledje čanastumit Norgii. Orru nu lahka mu ruovtturiikka, ja de livččii geografiija bokte vuogas diehtit man lahka.
Girjjis oaidná ahte váilevaš namat leat eanaš dalle go lea sáhka váivves ja ilgadis dáhpáhusain. Go girječálli eallin rievdá, ja lea sáhka čuovgadet fáttáin, de leat namat; Stockholm, Maria Andersson ja Ruoŧa beakkálmasaid namat.
Buorre vai ii?
Jon Henrik čállá ovdasánis ahte son háliida čájehit ahte eallinroasut eai bistte agibeaivvi. Máilbmi dovdá su artistan, ja mii leat oaidnán su lihkostuvvama iešguđet oktavuođas.
Girji doalvu min su eallima čiegus beallái. Doppe gos neavrrit oaguhit su nieguin, olbmot oaguhit albma ilmmis ja gos eallit ohcalit ja dearvvahit su.
Jon Henrik muitala dakkár áššiin maid ollugat dađi bahábut eai duostta earáide muitalit. Ja girji soaitá deaivat juste sin geat dárbbašit ahte muhtun hástala ohcat veahki.
Dehálaš girji
«Månbarn - min berättelse» lea álkit čállojuvvon, ja dáhpáhusat bures čilgejuvvon. Su dovddut ja rahčamušat bohtet čielgasit ovdan, ja juste diet čájeha su olmmošlaš beali.
Sámis eai leat vuos nu ollu dákkár biografiijat, ja danne lea dát girji iežas rabasvuođain ja rehálašvuođain oalle dehálaš.
Girječálli guovttos Jon Henrik Fjällgren ja Maria Andersson eaba vikka čiŋahit maidege, muhto baicca muitaleaba njuolga movt lei, ja ain lea.
Dát árvvoštalli ii leat máŋgga jahkái vásihan ahte girji lea nu geasuheaddji ahte lea váttis bidjat dan eret. Dat doalaha mu sáhkkiivuođa olles áiggi, go dieđán ahte mun lahkonan dálá áigái.
Veahá beahtahalan go in beasa diehtit veahá eanet movt Jon Henrik Fjällgrenas lea juste dál. Lea go son lihkolaš vai ii. Muhto mun jáhkán, ahte sutnje dagai buori beassat muitalit.
Giitu, Jon Henrik.