Mánát gárte duiskalaččaid mielde

RiddoDuottarMuseat-Porsáŋggu musea ja Mearrasámi diehtoguovddáš lágidedje deaivvadeami Billávuonas Porsáŋggus gieskat gosa Hartvik Johansen ja Eli Richardsen leigga bovdejuvvon muitalit sudno eváhkoáiggi vásáhusaid birra nuppi máilmmesoađi loahpageahčen. Hartvik ássá Jovnnanjárggas ja Eli ges Ikkaldasas Porsáŋggus. Deaivvadeapmi lei eváhkoáiggi govvačájáhusa birra mii dál lea oaidnimis Mearrasámi diehtoguovddážis Billávuonas.

Iske dávttiid gávdnandihti mii lei dáhpáhuvvan

Juovlamánus 1944:s dat duiskalaččat vižže golbma ja bealle jahkásaš Eli, su guokte viellja ja sin áhkku goađis mii lei várrevielttis dan botta go mánáid áhčči ja eadni leigga viesus viežžamin biergasiid maid dárbbašedje meahcis. Maŋŋá go buohkat ledje ollen olggos goađis de duiskalaččat cahkkehedje dan buollit. Go dolla lei jáddan ja čoskon de iskkaiga Eli áhčči ja áhčči viellja beaivvi maŋŋá gunaid mat ledje báhccán maŋŋá go goahti lei buollán. Ulbmilin lei iskat gávdnojedje go olbmodávttit gunain muhto go eai daid gávdnan de árvideigga ahte duiskalaččat dat ledje dolvon mánáid ja sin áhkku.

Carl Arp mielde Narviikii

Eli muitala ahte su muittu miel sii gárte Carl Arp nammasaš fatnasa mielde mátkkoštit gitta Narviikii. Eli lei dalle dušše golbma ja bealle jagi boaris ja ii loga muitit eará go issoras dáhpáhusaid. Lohká earret eará haksán dakkár issoras hája fatnasis ja go bohte Totenii de muitá beatnaga mii su rohkkáhii ja ain otne ballá Eli beatnagiin.

Stuorra illu go bohte Ikkaldasii geassemánus 1945:s

Geassemánus 1945:s sii bohte Ikkaldassii smávit fatanasa mielde ja Eli Richardsen lohká ahte ollu olbmot ledje boahttán sávvat sidjiide bures boahtima ruoktot. Olbmot illudedje muhto Eli gal čierui.