NRK Meny
Normal

Mánát čikčet ruosti buolašin

Spábba jorrá gámanjunis gámanjunnái Kárášjoga skuvlašiljus vaikko čalbmeguolggat leat ritnon ja snuolggat golget.

Fotball om vinteren

Mánáid mielas lea dušše somá buollašis lihkadit, ja nu eai hahpet galbmot.

Foto: Frode Grønmo / NRK

– Dat lea váttis gápmagiiguin čiekčat, go de lea nu gálja, lohká Mathis Somby.

Máhtte ja su olbmát čikče spáppa Kárášjoga skuvlašiljus friddjaminuhtas, vaikko mánnodaga lei olgun ruosti buolaš.

Vuollel 40 buolašgráda.

Geahčá TV-ášši: Mánnodaga Ođđasat

Buolaš hehtte biilaeaiggádiid

Vaikko buolaš ii hehtten mánáid spáppačiekčamis, de lea dát hehtten biilajohtolaga davvin, muitala NAF-bargi Egil Olsen.

– Dat lea fal veaháš čoaskkis odne, eahpitkeahttá! Nu ahte máŋga biilaeaiggáda eai ožžon johtui iežaset biilla ja nu šadde vuordit veahki, lohká Olsen.

NAFa lea viežžan máŋga biilla Essoii ja liekkadan daid. Dát lea movttiidahttán máŋga olbmo geat leat leamašan heađis buollaša geažil.

Elektrihkar Ove Kristiansen fertii čuojahit Erika veahkehit su, go su fitnodatbiila ii vuolgán.

– Biila lei jikŋon oalát go iđđes lei ruovttus 43 buolašgráda, čilge son.

Kristiansen orro veaháš behtton go son ii jáhke ahte biilla mohtorliekkadan rustet šat doaibmá, muhto su mokta lea buorránan go Erik lea liekkadan biilla Essos.

Guorbmebiillas jikŋo goazanat

Finnmárkku biras bálvalusa(FIMIL) guorbmebiilavuoddji galggai dušše deavdilit diesela Statoilas, muhto goazanat jikŋo nu ahte juvllat eai šat jorran.

Lihkus oaččui son veahki mašiidna čeahpis Trailer og MaskinService:as(TMSAS).

– Áibmu goazaniiguin lea jikŋon. Dál ii leat eará geahččalit liekkadit daid, muhto son eahpida ahte son nagoda dan, lohká Bjørn Ove Thomassen.

Gaskavahkku bivalda veaháš

Kárášjogas buolaštii sotnabeaivve vuollel 40 buolašceahkkái. Illusáhka lea ahte meteorologat dieđihit ahte Davvi-Norggas bivalda gitta guovttelot buolašceahkkái.

Muhto skuvlabárdni, Máhtte, ii beroš gal das beare olu. Su mielas lea suohtasit spáppačiekčat go lea buolaš.

– Dalle eai leat nu máŋggas dáppe báne nalde, go buohkat eai olle skuvllii.

Loga eambbo Kárášjoga skuvlla birra.

Skuvla ii gidde uvssaid ovdal go 50 buolašgrádii čákŋá temperatuvra, muhto skuvlabiillas lea ráddji man buollašis viežžá mánáid skuvlii.