Duodderudá riek ávkken

– Dát la de ávvudahtte, ja riek buorre mijá dárbojda.

Dav javllá Vuonak mánájårruha jådediddje Charlotte Paulsen gå Sámedikkeráde duodderudájt juollot ma galggi gielladåjmajt mánájårruhin gievrodahttet, dagu dal bálkálasádussaj.

Sámedikkeráde l aj juollodam 200.000 kråvnå duodden prosjevtajda ja åvddånahttembarggguj.

Jådediddje Vuonak Mánájårruhin, mij la Hábmera suohkanin, subtsas juska l siján dåssju akta åssudahka, de huoman mánájt juohki unnep juohkusijda. Ja dát doarjja mav de Sámedigge dálla buktá galggá mánájt ienep gielan lávkudit.

– Midjij dát merkaj oadtjop ájn vil nuppe giellatjiehpev. Ja dat vat merkaj máhttep mánájt ájn vil ienebuv gielan lávkudit, javllá Paulsen guhti l juo åhtsåmusáv tjállám.

Åvddånahttembargguj aj rudá

Sámedikkeráde l aj mánájgárddefálaldagájda juollodam ájn vil 200.000 kråvnå ma de galggi prosjevtajda ja åvddånahttembargguj aneduvvat.

Sámedikkeráde Mikkel Eskil Mikkelsen la ávon gå dáv mánágárddesuorggáj dáv aj máhttá rijkav miehtáj fállat, ja javllá dárbbo l ienep mánájgárddefálaldagájda.

– Doajvov boados dássta l almma ásadiddje ma lij vat viehkken ienep máná oadtju fálaldagáv sáme mánájgárdijn.

Máhtti dal plánaj álgget

Charlotte Paulsen ij la ájn plánaj álggám masi jur dá rudá galggi, valla ávos javllá dát ållo sidjij merkaj.

– Ælla miján ájn plána, valla giehttum lip juo galggap juojddá barggat mij guosská dagu nuorráj ja guolástussaj. Danna lip juo giehttum stuoráp prosjevtav dahkat. Ja mån jáhkáv dát ålov merkaj. Ja de l nav ávvudahtte gå de dåhkki dagu dákkár prosjæktaj rudájt adnet.