NRK Meny
Normal

Mánáin vai mánáiguin?

Muhtumiidda lea máŋgii váttis diehtit ja fuobmát goas goappá hámi geavahit: mánáin vai mánáiguin? Jo, dás lea sáhka máŋggaidlogu lokatiivvas ja komitatiivvas.

leketøy
Foto: Wenche Lamo Hadland / NRK

Bija ovttaidlohkui

Máŋgii lea váttis fuomášit ja diehtit goabbá hápmi heive: "Mánáin leat olu duhkorasat" vai "Mánáiguin leat olu duhkorasat?" Dalle lea vuogas muitit dán njuolggadusa "Bija sáni ovttaidlohkui!":

1a) Mánás leat olu duhkorasat.

Jos sátnehámis gullo -s-geažus (mánás), de dat muitala ahte máŋggaidlogus galgá leat dákkár hápmi mánáin. Ja -in-geažus muitalage ahte lea máŋgga mánás sáhka:

1á) Mánáin leat olu duhkorasat.

Eará ovdamearkkat:

Ovttaidlogus:

2a) Njunnošis leat olu barggut.

Máŋggaidlogus:

2á) Njunnošiin leat olu barggut.

Njunnošiin vai njunnošiiguin?

Muhtumat gis váruhit ahte eai eisege galggašii geavahit boasttu hámi, ja de sáhttá geavvat gis nu ahte eai geavat máŋggaidlogu komitatiivva dalle go galggašedje:

Okta njunuš:

3a) Su mielas lei ávkkálaš deaivvadit politihkalaš njunnošiin.

Máŋga njunnoša:

3á) Su mielas lei ávkkálaš deaivvadit politihkalaš njunnošiiguin.