Giitevaš áhkku

71-jahkásaš Kari Høgden giitá Ipmila go su golbma mánáidmáná bohte dearvan ruoktot Utøyas.

Kari Høgden med barnebarn

Kari Høgden mánáidmánáin Stine Marie Høgdenin.

Foto: Alsak Ilkka Niittyvuopio / NRK

– Go viimmat gullen ahte buot golmmas ledje dearvan, de geahppánii moraš. Seammás lea nu lossat go nu oallugat masse mánáideaset, lohká Kari Høgden.

Kárášjoga AUFas ledje 12 nuora mannan geasseleirii Utøyii. Buohkat besse heahkkas, muhto dássážii leat 68 nuora duođaštuvvan jápmán terror-ákšuvnnas Utøya sullos suoidnemánu 22. beaivve 2011.

– Olmmoš ii goassege vajálduhte iežas máná, it don goassege heaitte morašteamen iežat máná, lohká Høgden.

Kari Høgden massii nuoramus bárdnis biilalihkohisvuođas 20 jagi áigi.

– Dán háve in ribahan ovtage. Mii beasaimet jápmimis, muhto Utøya dáhpáhusain šaddet mánát guhká rahčat. Mánát leamaš dego soađis, dat ii leat leaika.