Bådåddjå sámi vánhemiid fierpmádat dáhttu suohkana plánegoahtit ásahit sámi mánáidgárddi.
Váhnen Mary Knutsen, lohka dárbbašlažžan ásahit sámi mánáidgárddi vai sin mánát oahpašedje sámegiela ja sámi kultuvrra birra.
Bådåddjo guovddáš
Knutsen lohka vánhemiid hálidit ahte sin mánát šaddet čeahpit sámegielas, ja seammás mánáidgárdi maid nannešii identitehta dovddu. Bådåddjå han lea Nordlándda sápmelaččáid guovddáš gávpot.
Bådåddjo julevsámi vánhemat leat váldán oktavuođa suohkana sátnejođiheaddjiin Odd-Tore Fygle ja cállet maiddái reivvesteaset sutnje ahte suohkanis leat birrasiid guoktelogi julevsámi máná geat sáhtáše álgit sámi mánáidgárdái, ja birrasiid logi máná geat leat skuvlla asttoáigge fálaldaga dahje SFO agis.
Ásahit plánenvirggi
Julevsápmelaččás Mary Knutsenis leat guokte smávva máná, boarrasat, gii lea golmma jahkásaš, oaččui sámegiel oahpu Divttasvuona sámi mánáidgárddis go orro doppe. Váhnemat hálidit ahte mánát ohppet giela ja kultuvrra maiddái olggobealde ruovttu.
Sin mánáin lea vuoigatvuohta oažžut lága bokte sámi mánáidgárdde fálaldaga, ja Bådåddjå suohkan berre oaidnit iežas geatnegasvuođa, lohka Knutsen.
Sámi vanhemiid fierpmádat Bådåddjås dáhttot sátnejođiheaddji ásahit fálaldaga jo boahtte čavčča rájes. Sii dáhttot maid ossodatjođiheaddji virggi dál jo ásahit, vai beasašii plánegoahtit.
Bådåddjå mánáidgárddehoavda, Liv Bjørnstad, ii loga iežaset álgan plánet sierra mánáidgárddi sámegielagiidda, muhto lohka sáhttit vejolažžan geahččalit boahtte čavčča, čállá áviisa an.no.