NRK Meny
Normal

Mánáiddearvvašvuođabálkkašupmi SÁNÁG:ii

Sámi našuvnnalaš gealboguovddáš- psyhkalaš dearvvasvuođasuddjen ja gárrendilledikšu (SÁNAG) oažžu Barnehelsepris 2017. Bálkkašupmi geigejuvvo Bergenis otne.

Lekerom i SANKS i Karasjok
Foto: Majjen Ristiinna Eira / SANKS

Psyhkalaš dearvvašvuođasuddjen ja gárrendilledivššu mánáid ja nuoraid ovttadagat SÁNAG:is Kárášjogas juolluduvvojit Barnehelseprisen 2017.

Norgga mánáiddoaktáriidsearvi ja mánáidáittardeaddji dat juhket bálkkašumi heivvolaš evttohasaide.

Dán jagi geigejuvvo bálkkašupmi mánáiddoaktáriidbeivviid (Pediaterdager) oktavuođas mat lágiduvvojit Bergenis.

Stuorát áddejupmi ja buoriduvvon praksis

Mánáid ja nuoraid ovttadagat Kárášjogas ožžot bálkkašumi go leat nannen psyhkalaš dearvvašvuođasuddjema kvalitehta ja go leat buoridan sámimánáid dearvvašvuođadili Norggas.

Bargiid guhkit áigge rahčamušat ja barggut dutkama, oahpaheami, bagadallama ja klinihkalaš bargguid oktavuođas namuhuvvojit dehálažžan bálkkašumi nammadeamis.

Guovddáš lea maid seammás nagodan hukset transkultuvrralaš mánáid ja nuoraidpsykiatriija gelbbolašvuođa buori jođiheami bokte.

SÁNAG lea váikkuhan buoret praksisii ja stuorát áddejupmái daid fágasurggiiguin, mii fas lea dagahan ahte unnitloguálbmogiid mánáiddearvvašvuohta lea buorránan Norggas.

– Stuorra gudni ja movttiidahtti

SÁNAG:is vulget golbma bargi Bergenii vuostáiváldit bálkkašumi. Anne Karin Steffensen lea okta sis. Su mielas lea somá go sin ovttadagat ožžot ánssu ja dohkkehusa dan barggu ovddas maid sii barget sámi mánáid dihte miehta Norgga.

– 2005 rájes lea dát viđát geardde go juhket bálkkašumi, ja dat han dagaha dán nammadeami vel ain eanet erenoamážiin, muitala Steffensen. Okta gii ovdal lea ožžon dán bálkkašumi lea Jens Stoltenberg guhte oaččui boahkkudanfoandda barggu dihte.

Gunn Heatta

SÁNAG jođiheaddji Gunn Heatta lohká bálkkašumi movttidahttin.

Foto: Siv Eli Vuolab / NRK

Maiddái SÁNAG jođiheaddji Gunn Heatta mielas lea dát nammadeapmi stuorra gudnin.

– Dát movttiida min, sihke jođiheddjiid ja bargiid, ain joatkit bargat ovddidit sámi mánáid dearvvašvuođa. Mii movttiiduvvot joatkit bargguin váikkuhit dan guvlui ahte sámi kultuvra ja giellamáhttu stuorru, lohká son.