NRK Meny
Normal

Stálugilvvut "Oscar"-nominerejuvvon

Mánáid-TV buvttadeapmi Stálugilvvut lea beassan máilmmi stuorámus mánáid-tv festivála, Prix Jeunesse International, loahppagilvvuide. Dát festivála gohčoduvvo "mánáid-TV Oscarin".

Stállu šattai movtta go gulai ahte Stálugilvvut lea finálaide.

Stállu lei movtta go gulai ahte Stálugilvvut lea finálaide.

Foto: Tor Egil Rasmussen / NRK

Prix Jeunesse lea lágiduvvon 1964 rájes. Sáddehagat ja buvttadanfitnodagat miehtá máilmmi oassálastet dasa juohke nuppi jagi. Dál lea vuosttaš geardi go NRK Sámi buvttadus lea beassan gitta Prix Jeunesse -loahppagilvvuide.

– Mii leimmet dieđihan guokte buvttadeami, Stálugilvvut ja Iežár-prográmma. Nu ahte sáhttá dadjat ahte bealli min buvttademiin beasai Prix Jeunesse finálii, boagusta Mánáid-TV redaktevra Norleif Krokmo.

Stálugilvvut oasis mii sáddejuvvui Prix Jeunessii leigga Sara Elle ja Rávdná oasseváldit

Stálugilvvut oasis mii sáddejuvvui Prix Jeunessii leigga Sara Elle ja Rávdná oasseváldit.

Foto: Tor Egil Rasmussen / NRK

Measta dego Oscara

Measta 400 prográmma ledje dieđihuvvon Prix Jeunessei. Dušše okta viđátoassi dáin buvttademiin čájehuvvojit festiválas dego finalisttat.

Stálugilvvut lea mielde kategoriijas "non-fiction 7-10 jahkásaččaide", ja dán kategoriijas leat 21 buvttadusa finálas.

– Dán in lean gal vuordán, go doppe lea nu jalla garra gilvu buvttadusaid gaskka. Mun gullen ovdamearkka dihte ahte mii časkkiimet maiddái SVT buvttadusaid, ja sihkkarit časkkiimet vel moadde BBC prográmma, čaibmá Stálugilvvuid bagadeaddji John Egil Utsi.

– Galgego moai ávvudit otne? Dát han lea measta dego Oscarii nominerejuvvot, jearrala Norleif.

– Dan gal sáhtte. Ožžo vel daid earáid mielde geat leat bargan Stálugilvvuiguin. De mii beassat dánsestit dan Stálugilvvuid dánssa, reašká John Egil.

Stálugilvvut bargit.

Stálugilvvut bargit.

Foto: Tor Egil Rasmussen / NRK

– Mun goit searvvan diesa!, gullo buvttadeaddji Lemet Ailo Holmestrand feaskáris čuorvumin.

Prix Jeunesse lágiduvvo miessemánu 25.-30. Beivviid Münchenis.