Rikkis ja fámolaš fitnodagat leat bahkkegoahtán Loliondo guvlui Tanzanias, gosa Mama Sara dahje Gutnel Biret Sara Buljo lea huksen skuvllaid masaijaid mánáide.
– Stuorra safari fitnodagat áiggošivčče eambbo eatnamiid váldit masaijain vai beasašivčče váldit dohku rikkis olbmuid vai besset bivdit elliid, muitala Gutnel Biret Sara Buljo.
– Duođai ballán
Golbma vahku áigi go Mama Sara galledii Davvi-Tanzania ja son áitojuvvui ja oaguhuvvui Loliondos Davvi-Tanzanias sihke politiijáide ja eará organisašuvnnaide ja son váldui maiddái giddagassii.
– Mun ledjen duođai ballán, muitala Mama Sara. Dat lea juoga mii sutnje ii leat guossege ovdal dáhpáhuvvan.
– Mii eat leat dahkan ovdal ge eará láhkái, muhto dál ledje nu olu ságat min birra mat eai lean duođat ja áitán min. Mis lei issoras dilli, čilge Mama Sara.
Mama Sara jáhkká, ahte lea okta orgánašuvnna mii áitá su ja viggá sin bágget ruovttoluotta ja singuin ovttasbargat. Organisašuvnnat geavahit buot fámuid.
– Dat láite mu nu garrasit, ahte illá dusten vuolgit Loliondoi muhto eamiálbmot organisašuvnnat sihte mu boahtit. Vai beasan čilget dili go ledje olbmot gielistan min organisašuvnna birra. Earet eará gullen ahte mun galgen leat guođđán másaija mánáid ja hilgun sin. Gullen máiddai ahte Mama Sara lea bohtán lobiheamit Loliondoi ja ahte mii mahkáš vuosttildit ráđđehusa, čilge son.