NRK Meny
Normal

Máksit SGP plagiahtta guorahallamiid

Sámi Musihkkafestivála gáibida mávssu olbmuin geat dáhttut Sámi Grand Prix lágideaddjiid iskkat leat go lávlla dahje luohtti plagiahtta.

Nils Johan Vars

Sámi Musihkkafestivála buvttadeaddji, Nils Johan Vars, lohká váldigoahttit mávssu jos šaddet iskkagoahttit Sámi Grand Prix plagiahttačuoččuhusaid.

Foto: Kjell Are Guttorm / NRK

Jos dán jagi oaivvildat Sámi Grand Prix lávlaga dahje luođi dakkárin mii ovdal lea gullon, plagiahttan, de ferte 10.000 kruvnna máksit Sámi Musihkkafestiválai ovdalgo iskkagohtet lea go plagiahtta.

– Jos ii máksu, de ii bargagoađe Sámi Musihkkafestivála čuoččuhusaiguin, muitala buvttadeaddji Nils Johan Vars.

Son maid lohká dán jagi SGP vuoitiid beassat njuolga boahttejagi finálai mielde, ja nu šaddá ovddasguvlui, vuoitit mielde nuppejahkái jos hálidit.

  • Loga maid: SGP oassegilvvut Sámi álbmotbeaivve
  • Dás gulat jearahallama Sámi Musihkkafestivála buvttadeaddjin:

– Man mielde mearridit?

Juigiid searvvi jođiheaddji, Biret Risten Sara, imašta man vuođul SGP áigu mearridit ahte lea go luohti plagiahtta vuoi ii.

– Dat lea nu ahte luohtái han eai leat ráhkaduvvon makkárge njuolggadusat man bokte sáhtte mearridit ahte lea go plagiahtta vuoi ii, ja dalle mun imaštalan, man mielde bat áigut mearridit daid áššiid mat gusket luohtái?

Dattetge jáhkká Sara ahte juoigi guhte oaivvilda eará luođi plagiahttan boahtá vuoittáhallat.

– Go dat han ii leat čielggas guđe lágiid mielde galgá dan meannudit.

Su mielas lea dát olu ruđas sáhka

10.000 kruvnno lea su mielas ollu ruhta dasa gii oaivvilda ahte son lea manaheamen bearašluođi, dahje iežas luođi.

Jus SGP lea ráhkadan njuolggadusaid mo dán sáhttá meroštallat de oaivvilda Juigiid searvvi jođiheaddji ahte SGP ferte álmmuhit daid.

  • Gula jearahallama Biret Risten Sarain:
  • Juigiidsearvvi jodiheaddji Biret Risten Sara mielas ii leat heivvolaš váldit mávssu plagiahtta guorahállama ovddas ovdalgo leat albma njuolggadusat.