NRK Meny
Normal

Máilmmikonferánsa álgá

Máilmmi presideanttat, ráđđehushoavddat ja ministarat ovttas álgoálbmogiiguin leat čoahkkanan Ovttastuvvon našuvnnaid máilmmikonferánsii álgoálbmogiid birra, dohkkehit oktasaš njuolggadusaid mat nannejit álgoálbmogiid vuoigatvuođaid.

Åpning av UNPFII 2012

Dáppe rahppo Ovttastuvvon našuvnnaid máilmmikonferánsii álgoálbmogiid birra vuossárgga. Vuosttas geardde beassá álgoálbmogiid válljen politihkkár rahpat oaivečoahkkima ovttas stáhtaid njunnošiiguin.

Foto: Siv Eli Vuolab / NRK

Álgoálbmogiid njunuš Austrálias ja šiehtadalli Les Malezer dadjá ahte ollet dán muddui lea leamaš moalkái, go sihke stáhtat ja álgoálbmogat leat rahčan boahtit ovttaide. Son lea ovttas Nicaragua Dr. Mirna Cunninghamain, ovddastan álgoálbmotogiid dán barggus.

-Dáinna ovttasbargguin duođaštat ahte álgoálbmogat máhttet internašunála dásis šiehtadallat. Mis lea nana gelbbolašvuohta, hárjáneapmi ja danne oaččuimet vejolašvuođa šiehtadallat máilmmedásis, lohká Les Malezer.

Nannet álgoálbmogiid vuoigatvuođaid

Vuossárgga álgá Ovttastuvvon našuvnnaid máilmmikonferánsa álgoálbmogiid birra. Dán stuora čoahkkimii New Yorkas leat boahtán máilmmi stáhtaid jođiheaddjit ja ovddasteaddjit.

Dasa lassin maid álgoálbmogat miehtá máilmmi. Ulbmiliin lea dohkkehit dokumeantta mii nanne álgoálbmogiid vuoigatvuođaid.

Mielde rahpamis

Vuosttas geardde Ovttastuvvan našuvnnaid historjjás, de beassá álgoálbmogiid válljen politihkkár rahpat oaivečoahkkima ovttas stáhtaid njunnošiiguin. Norgga Sámediggepresideanta Aili Keskitalo beassá dan oktavuođas sárdnidit máilmmi riikkaid ovddasteddjiide.

Máilmmi álgoálbmotovddasteaddjit čoahkkanedje vel sotnabeaivve ságastallat ja oažžut lasi dieđuid ovdalaš konferánssa.

  • Guldal Aili Keskitalo jearahallama: