Máilbmi lea liegganeame, lieggana golmmain grádain jagi 2100 rádjái, vaikko Parisašiehtadus-2015 mihttu lea ahte máilbmi ii galgga liegganit earágo guvttiin grádain.
Dat mearkkaša ahte riikkat fertejit gávnnahit man olu sii leat nagodan ráddjet CO2-nuoskkideami, vai máhttet mihtidit man olu dás duohko fertejit ráddjet, nu ahte sii olahit Parisa 2015 mihtuid.
Buot riikkat leat juo soahpan oktasaš mihtu man olu sii galget ráddjet fossiila boaldima, go vuolláičálle guokte jagi áigi Paris 2015 soahpamuša.
Čoahkkin bisttii 12 diimmu guhkit go dan maid ledje plánen.
- Loga:
Ođđa árvvoštallan jagi 2018:s
Boahtte jagi COP24:s mearridit riikkat láhkagirjji Parisa 2015-šiehtadussii Katowices, Polenis.
Parisašiehtadusa eahpekonkrehta mihtuid galget dalle fuollat bastileabbon, vai daid sáhttá gieđahallat praktihkalaččat.
Polena čoahkkimis mearridit riikkat maiddái man olu sii fertejit ráddjet CO2-nuoskkideami, vai nagodit bisuhit máilmmi liegganeami gaskal 1,5 ja 2 gráda.
Dálá ON birasprográmma čájeha ahte riikkaid dálá CO2-lohpádusat eai olat go goalmmádasoasi mearriduvvon mihtuin.
Dát mearkkaša dan ahte dálá loguid vuođul lea máilbmi liegganeame johtileappot go dan meari maid leat soahpan. Jus dálá ovdáneapmi bisuhuvvo, de lieggana máilbmi golmmain grádain jagi 2100 rádjái, iige guvttiin nugo lea mihttun.
– Buhtes máilmmi guođđit mánáide
– Ovttas mii sáhttit hukset dan máilmmi maid mii háliidit, máilmmi mainna mii sáhttit čevllohallat maid dalle go mii guođđit dan iežamet mánáide ja máttarmánáide, dan lea ovddeš ON generálačálli Ban Ki-moon dadjan dálkkádatrievdama oktavuođas.
– Mii dárbbašit buoridit dábiideamet viđa iešguđet ge váldosuorggis. Dat leat emišuvdna(man olu kjemikálaid luoitit), heiveheapmi, finánsa, ovttasbargu ja jođiheapmi, dadjá Guterres.
COP23 lea dat 23 riikkaidgaskasaš čoahkkin mas ON riikkat ovttasbarget dálkkádatrievdamiid vuostá. Conference of Parties(COP) lágiduvvo jahkásaččat, ja doppe gehččet movt miellahtturiikkat leat vuhtiiváldán julggaštusa mearrádusaid.
COP álggahuvvui Rio Earth Summitas jagi 1992:s, mas "Rio julggaštus" fátmmastii ja árvvusanii ON barggu dálkkádatrievdamiid vuostá (UNFCCC). Dát julggaštus álggahii barggu unnidit olmmošlaš aktivitehta, mii goarida dálkkádatvuogádaga. UNFCCC doaibmagođii 1994:s, ja dat lea olahan dan maid sáhttá gohčodit measta universála miellahttuvuohtan máilmmiviidosaččat. Oktiibuot 196 riikka leat miellahttun.