Juovlaruohta sáddejuvvui nu gohčoduvvon «njozes-TV», dahje «Slow TV», BBC4-nammasaš brihttalaš TV-kanálas.
Dát guovttetiibmosaš TV-prográmma, mas geahččit besse TV bokte vásihit heargeráidomátkki Finnmárkuduoddaris, árvvoštallojuvvo leat okta dain buot buoremus prográmmain dáid juovllaid.
– Heargevuoddjin. Dušše dat. Guokte tiimmu badjel. Hearráid, ja dákkár TV-prográmma dat čájehuvvo eahkedis! Ja hearggit dat leat hoavddat dás.
Nie čállá BuzzFeed- nammasaš neahttabáikki čálli, Scott Bryan.
- Guovllas prográmmaoasáža dás vuolábealde:
- Loga dárogillii: Brihttalaččat besset oaidnit sámi «njozes-TV» juovlaruohta
– Ulbmil lei gávdnat hávskes, heivvolaš juovlaprográmma
TV-prográmma namma lea «All Aboard! The Sleigh Ride».
– Mii gávnnaimet boares poastabálgá mii geavahuvvui gitta 70-logu rádjai, mas ii leat geaidnu lahkosis. Dán bálgá mielde leat sápmelaččat johtán herggiiguin máŋgačuohti jagi.
– Jurdda lei gávdnat juoidá mii heive dan nu gohčoduvvon njozes-TV hápmái, ja nie dat earát evttohedje heargeráiddu ja -johtima árktalaš guovllus, sápmelaččaiguin.
Nie muitala TV-prográmma buvttadeaddji, Luke Korzun Martin, neahttabáikái BuzzFeed:i.
- Loga neahttabáikki olles árvvoštallama dás (teaksta lea eaŋgalasgillii)
NRK:s maid njozes-TV-plánat bohccuiguin
NRK njozes-TV-prošeavttaid jođiheaddji, Thomas Hellum, lea čuvvon mielde BBC prográmmabuvttadeami «All Aboard! The Sleigh Ride».
– Máilmmečába govat. Somá ahte BBC lea dán dahkan, vaikko sis lea gal veahá eará vuohki ráhkadit njozes-TV go NRK:s.
Datge dadjá Hellum Aftenpostenii ahte NRK:s eai leat plánat čájehit «All Aboard! The Sleigh Ride».
– Mis leat iežamet plánat ráhkadit njozes-TV Finnmárkuduoddaris, gos áigot minuhtas minuhttii čuovvut giđđajohtima, dadjá Hellum.
Álmmuhuvvon neahtta-TV-prográmman
BBC lea dál álmmuhan olles TV-prográmma internehttii.
Neahttalohkkit geain lea nu gohčoduvvon brihttalaš IP-čujuhus, lea vejolašvuohta TV-prográmma oaidnit interneahta bokte.
- Dán siidui lea TV-prográmma álmmuhuvvon (olgguldas čujuhus).