NRK Meny
Normal

Máilmmi čalmmit oidnet miellačájáhusaid

Álgoálbmogat servet miellačájáhusaide Brasilas, vai riikkaidgaskasaš servodagat oidnet sin dili.

Demonstrasjon i Brasilia

Brasila eamiálbmogat leat dolkan eiseválddiid badjegeahččamis, ja lágidit miellačájáhusaid spábbačiekčan máilmmimeašttir gilvvuin.

Foto: STRINGER/BRAZIL / Reuters

Otne álget Brasilas Máilmmimeašttir gilvvohallamat spábbačiekčamis. Ovdal go čiekčamat álget, de leatge leamašan stuorra miellačájáhusat.

Miellačájáhusat maidda riikka álgoálbmogat leat searvan.

Dáhttot fuomášumi

Buot máilmmi čalmmit leat dál geahččamin Brasila ja Máilmmimeašttirgilvvuid. Dasto leat álgoálbmogat Brasilas oaidnán vejolašvuođa čájehit máilbmái makkár surgadis dilis sii leat, oaivvilda álgoálbmotáššedovdi Magne Ove Varsi.

– Álgoálbmogat oidnet máilmmi meašttirgilvvuid vejolašvuohtan oažžut fuomášumi, maiddái riikkaidgaskasaččat, makkár vártnuhis dilis sii ellet. Eatnamiid, mat gullet álgoálbmogiidda árbevirolaččat – daid gáržžideamit eai beasa viidánit. Ovtta láhkai sin reserváhtat gáržot eambbo ja eambbo, muitala Varsi.

Soahti eanandolliiguin

Ruvkedoaimmat leat álggahuvvomin miehtá máilmmi, maiddái Brasilas.

– Eiseválddit leat maiddái rahpamin ruvkedoaimmaid eamiálbmot guovlluide, ja dasa lassin sis lea soahti vilges eanandolliid vuostá. Eanandoalli lea issoras stuoris, rikkis ja gievra Brasilias. Dat besset eambbo ja eambbo váldit eamiálbmogiin, joatká Varsi.

Magne Ove Varsi

Álgoálbmotáššedovdi Magne Ove Varsi muitala ahte Brasila álgoálbmogat leat váttes dilis. (vuorkágovva)

Foto: Dan Robert Larsen / NRK Sápmi

Maid sii áigot olahit dáinna?

– Sii dieđusge háliidit ahte sin gáibádusat vuhtiiváldojit. Sin eatnamat eai galgga gáržžiduvvot, ja eai galgga vel eambbo kolonialiserejuvvot dáid eanandolliid dárbbuid mielde ja ruvkedoaimmaid geažil.

Son dadjá ahte lea sáhka vuoigatvuođaid birra, ja eamiálbmogiid iešmearrideamis.

– Sii galget beassat mielde váikkuheamen lágaide, mearrádusaide, ja doaibmabijuide, mat váikkuhit sin árgabeaivái, birgejupmái, ja eallindillái obanassiige. Máilmmimeašttirgilvvut leat hui buorre liiba čalmmustahttit eamiálbmogiid rahčamušaid ja váttisvuođaid.