Mii deaivvadat Nils Einar Mathisenin su ruovttus Unjárggas gos son lea geahččaladdamin biktasiid maid heive coggat badjelii go vuolgá gonagaspára, gonagas Haralda ja dronnega Sonja, guossái.
Muhto jus galgá čuovvut gohččuma mii boahtá ovdan bovdehusas, de sus eai leat galle molssaeavttu. Áidna mii dohkkehuvvo, lea sevdnjesivnnat dreassa.
Artihkal joatkašuvvá maŋŋá gova:
– Mus gal lea sevdnjes dreassa, muhto in leat sihkkar ahte lea go doarvái čáhppat, árvvoštallá Nils Einar go roggasta dreassa bivttasskáhpes.
Skáhpes heaŋgádit maid čikŋabuvssat, -báiddit ja -šlipsat.
Háliida coggat sámegávtti
– Muhto mus gal bealistan livččii maid nubbi eará alternatiivva. Maid don gáttát jus man dáinna boađášin gonagasfatnasii, árvvoštallá Nils Einar mojunjálmmi ja rohtte olggos sámegávtti.
Lohká iežas loaktit buorebut sámegávttiin go dáža čáhppesdreassain.
– Várra čuojahasttán njuolgga gonagassii ja jearan oaččun go coggat badjelii biktasa man eanemus anán árvvus, lohká Nils Einar.
Go Unjárga lea sámegielda, de su mielas lea lunddolaš nahkihit sámegávtti go vuolgá guossái.
Doaivu gonagasfatnasa boahtit Unjárgii
Muhto dassážii go oažžu vástádusa gonagasas, de Nils Einar ráhkkana čiŋadit nie movt bovdehusas ávžžuhuvvo. Go geargá čiŋadeames, de rohttesta buksaleakkaid bajás.
– Na dánu in sáhte gonagasguossái gal vuolgit. Vilges sohkkát eai heive čáhppes gápmagiidda ja dressii, son árvvoštallá.
Go čáhppes sohkkát leat sajis, de ferte olggos iskat mot dat heive dáža čikŋabiktasiiguin váccašit Unjárgga káija alde.
– Ledjen doivon ahte gonagasfanas boahtá dán káijii, iige Čáhcesullui nu movt bovdehusas oidno. Dalle livččii beassan oaidnit eambbo Unjárggas, ja movt guolásteapmi dáppe duođai lea ovdánan maŋimuš áiggis.
Váldá árvogahpira mielde
Ii ge su mielas Čáhcesullos soaitte leat seamma fiertu go Unjárggas lea.
– De mun áiggun sihkkarastit ja váldit arvegahpira, «sydvesta», fárrui, muitala Nils Einar seammás go nahkihastá arvigahpira badjelii.
Artihkal joatkašuvvá maŋŋá gova:
Unjárga lea okta viđa Finnmárkku gielddas maid Norgga gonagaspárra áigu gallestallat suoidnemánus. Eará gielddat leat Fálesnuorri, Muosát, Davvesiida ja Gáŋgaviika.
Dán mátkkis leat oktiibuot 65 olbmo bovdejuvvon guossái gonagasfatnasii.
Jáhkkemeahttun bovdehus
Go Nils Einar gávnnai breava poastakássas, de álggos gáttii ahte dát lea muhtunlágan gálvovuovdalanbábir, mii lea boahtán.
– Muhto go studerešgohten konvoluhta, de fuomášin dan gonagassteampala. Dalle jurddašin ahte dát gal ferte leat eambbo go rekláma.
Go leahkui breava, de illá jáhkii mii das čuožžu.
– Jurdilin seammás ahte manne son mu lea bovden guossái.
Nils Einar lea leamaš mielde ovdánahttimin Unjárgga guolásteami. Dan geažil son jáhkká iežas dál leat bovdejuvvon gonagasa guossái. Sutnje lea dát stuorra gudnin.