– Dan diehti udnásj ideda mierredijma ilmodimev maŋedit, diedet Divtasvuona suohkanoajvve Tor Asgeir Johansen.
Iektu NRK tjálij mujttogierge ilmodime birra, mij la rádjálåvsåjda ja ietjá sámijda Divtasvuonan doarroájgij sinna gijtton. Maŋŋeboahttij mielas ij lim mujttogierge ilmodibme, mij la plánaj duogen, værddogis.
- Lågå aj:
Giese maŋŋela
Divtasvuona suohkan galggá dálla reaksjåvnåjt giehtadallat.
– Dálla galggap gæhttjat jus la juoga mij máhttá rievdaduvvat ja gåktu dáv ilmodimev tjadádit, ja de ienep diedoj boahtep almulasj ilmodime birra, javllá Johansen.
Suohkanoajvve subtsas ilmodibme giese maŋŋela sjaddá.
– Dáv tjuottjodav. Snjilltjamánon ij dåhkki gå la gássjelis ájgge gå ulmutjijn la giesseloahpe. Usjudaláv ragátmánno la buorre ájgge, ja tjavtja åvddåla dáv hæhttup ásadit.
Sávvá værddogis ilmodimev
Samuel Gælok, gut la avta rádjálåvsåjs bárnne mielas la buorre gå suohkan la dáv ilmodimev maŋedam.
– Mån hæhttum lav ålgus dájna ássjijn mannat gå nav boasstot la dagádum. Vijmak de jåvsådij Gånågisá vájvahibme Divtasvuodnaj.
Gælok javllá suohkan bierri værddogis ilmodimev dahkat, ja gåhttju suohkanav maŋŋeboahttijt sebrudahttet.
– Bierrip dálla aktan ságastit vaj ep dárbaha ruodjat gaskanimme.