Lávlunoasi vuoiti Nils Henrik Buljo váidališgođii sosiála mediain go 2015 Sámi Grand Prix CD-skearru ii leat vel fidnemis.
– Imaštalan manne ii leat vel ilbman dat CD-skearru, dál gal lean dolkan vuordimis, čállá son iežas Facebook siidui.
Lágideddjiid bealis šallošit go ná leat maŋŋonan.
– Áddemis artisttat jearahišgohtet CD-skearu, ja dieđusge šállošan go mii leat ná njoazit, ná ii leat dohkkálaš oba ge, muhto dán vuoro šattai nu lohká Sámi musihkkafestivála stivrrajođiheaddji Ellen J. Sara Eira.
LOGA:
(ášši lea dárogillii čállon)LOGA:
(ášši lea dárogillii čállon)Easka guovvamánus ilbmá
Lágideddjiid bealis muitalit dása leat máŋga sivva go ná leat maŋŋonan.
– Ádjáneimmet dáinna ná, go gárttaimet muhtin osiid ođđasit báddet. Álgobuvtta ii šaddan buorre, ja eatnašat háliidedje ođđasit lávlut ja juoigat. Dasa lassin galgá atnit muittus ahte gárttaimet buvttadeaddji haga čakčat, nu ahte dat maid maŋidii dán CD-skearu buvttadeami, lohká Eira.
LOGA:
(Ášši lea dárogillii čállon)– Dát maŋŋoneapmi ii leat artisttaid sivva, dan gal ferten deattuhit, lea baicce min lágideapmi mii ii leat doaibman lasiha Eira.
Liikkáge ii loga Sámi musihkkafestivála stivrrajođiheaddji dán maŋŋoneami ruđalaččat čuohcat oasseváldiide.
– Eai dat oaččo makkárge mávssu dán CD-skearu ovddas, ieš alddis lea vuoitun beassat álmmuhit iežas lávlagiid, oaivvilda Eira.
Geahča jearahallama Sámi Grand Prix 2015 vuoitiguoktin.
CD skearru galgá dálá dieđuid mielde ilbmat guovvamánu 6. beaivvi. Dalle almmuhuvvo duppal skearru, mas lea sihke SGP 2014 ja SGP 2015.