Ođđa Deanosoahpamuš maid Suoma Riikabeaivi ja Norgga Stuorradiggi leaba dohkkehan, dat lea suhttadan olu Deatnogátti ássiid.
– Njunušpolitihkkárat bealuštit dušše ruhtaalbmáid, eai ge beroš báikegotti fásta ássiin eai maidige, oaivvilda gárnjárgalaš Ola Laiti, Ohcejoga gielddas eret.
- Loga eambbo:
Seammás go bartaeaiggádiid vuoigatvuođat leat nannejuvvon, de báikegottálaččaid árbevirolaš bivdovuoigatvuođat leat garrasit gáržžiduvvon, sullii 80 proseanttain.
Laiti ollásit doarju báikkálaš luossabivdoservviid geat dál leat ráhkkaneamen stevdnet stáhtaid diggái mearrádusa geažil.
– Bággu han dan lea doarjut. Oažžut loktet buot fatnasiid gáddái jus dánu manná, lohká Laiti.
– Nuppi gieđain váldet – nuppiin addet
Bivdogáržžidemiid ulbmil lea buoridit luossagoargŋuma Deanočázádahkii.
Ola Láiti lea šlundon.
– Seamma ákkastallamiin leat eiseválddit don dološ rájes juo gáržžidišgoahtán fásta ássiid árbevirolaš vuoigatvuođaid, seammás go turisttaid vuoigatvuođat eambbo ja eambbo leat nannejuvvon. Dat eaddudahttá, čilge Laiti.
– Gáržžidangáibádusat bohtet Norggas
Suoma bartaeaiggádiid searvvi (Tenon kiinteistönomistajat ry) jođiheaddji Veikko Rintamäki lohká leat boastut suhttat bartaeaiggádiid ala go báikkálaččaid bivdovuoigatvuođat leat gáržžiduvvon.
– Gáržžidangáibádusat leat min dieđu vuođul boahtán muhtun Norgga beale joavkkuin, eaige mis, čilge Rintamäki.
Suomabeale deatnogáttis leat sullii 600 bartta. Badjelaš 50 bartaeaiggáda leat lahttut searvvis mii lea čuolahan bartaeaiggádiid beale Deanu ođđa soahpamuša oktavuođas.
– Ožžon dušše oasáža gáibádusas
Rintamäki čilge bartasearvvi gáibádusaid leat vuođuštuvvon dušše dasa mii dadjo Suoma vuođđolágas.
– Dat mearkkaša ahte eatnamiid fárus maid leat oastán Deatnogáttis, fertejit maid bivdovuoigatvuođat mat leat merkejuvvon vuođđogirjái, čuovvut mielde, čilge Rintamäki.
Su mielas vuođđolága ulbmil ii leat ollašuvvon ollásit Deanu ođđa soahpamušas. Dat eaddudahttá su.
– Bivdovuoigatvuođaid maid leat ožžon lea dušše oasáš das maid leimmet gáibidan, lohká Suoma bartaeaiggádiid searvvi jođiheaddji Veikko Rintamäki.
– Hálbbes koarta dušše moadde jándora
Suoma vuođđolága vuođul su mielas Suomabeale Deanuleagi bartaeaiggádiin galget leat seamma nana bivdovuoigatvuođat go mat báikki olbmuin leat, prinsihpas maiddái fierpmástanvuoigatvuođat.
Ieš ássá Seinäjokis, sullii 1000 km máttabealde Ohcejoga. Lihkká son boahtte geasi rájes, beassá bivdit hálbbes koarttain nie movt báikki olbmot álelassii leat beassan.
– Muhto Suoma earenoamáš njuolggadusaid geažil hálbbes koarta ii olat geavatlaččat eambbo go moatti jándorii olles geasis, Rintamäki čuoččuha.
Bartaeaiggádat besset maid registreret iežaset fatnasiid, mii mearkkaša ahte eai šat dárbbaš bivdit láigofatnasiin nu movt dássážii leat ferten.
– Dát dieđusge lea unna lávkkáš rivttes guvlui, Rintamäki čilge.
Ii kommentere diggeášši
Bartaeaiggádiidda lea jahkásaččat ráddjejuvvon oktiibuot 3.600 hálbbes bivdolobi. Dat oassi váldojuvvo turistaearis mii oppalohkái lea 22.000 bivdolobi, 11.000 lobi goappat beale rájá.
Rintamaki ii leat duhtavaš go sin bivdolobit vižžojuvvojit turistaearis.
– Go buot earit mat leat ráddjejuvvon bartaeaiggádiidda leat vuvdojuvvon, de mii ain besset gal bivdit, muhto dalle fertet máksit turistahatti, son čilge.
Rintamäki lohká iežaset registreren ahte báikkálaš vuoigatvuođalaččat árvvoštallet stevdnet stáhtaid diggái. Dađi eambbo ii hálit kommenteret dan.