NRK Meny
Normal

Luopmu árgabeaivvebargguin go turiste

Geassit su árgabeaivi lea girjái ja buđaldallamat leat doarvái.

Nilla Tapiola

Ohcejohkalaš fitnodateaiggát Nilla Tapiola

Foto: Jenna Rasmus/NRK

– Mu geassebeaivi lea dakkár ahte dan ii dieđe makkár beaivi šaddá. Kaleanddar dievvá iešalddes dan mielde makkár barggut deivet boahtit ja ođđa olbmot go bohtet de daid ferte oahpistit. Nu muitala ohcejohkalaš turistafitnodateaiggát Nilla Tapiola.

Nilla bargá oahpaheaddjin Ohcejoga vuođđoskuvllas, muhto go skuvla nohká giđđat de ii astta baljo luomu birra jurddašit go geassi lea Ohcejogas deháleamos áigi turismaealáhusa dáfus.

Guovtti máná áhčis leat doarvái doaimmat, go son lea maid Suoma sámediggeáirras.

Nilla Tapiola

Fanasmohtora divodanbarggut jođus.

Foto: Jenna Rasmus/NRK

– Luopmuhan lea dakkár ahte don beasat bargat juoidá áibba eará go dábálaš árgabeaivvebarggus. Dát lea muhtun láhkai munnje dego luopmu go mun beasan olbmuiguin bargat ja singuin leat olu dahkamušas, dadjá Tapiola.

Olu sáhka Deanu soahpamušas

Gieskat bođii ođas ahte Deanu čázádagas áigot geahpidit luossabivddu 30 proseanttain.

Stuorra oassi guovllu olbmuin leat duhtameahttumat ođđa guolástansoahpamuššii mii lea evttohuvvon ja máŋggas ballet earret eará árbevirolaš bivdokultuvrra jávkat.

Dán birra leamašange olu sáhka dán gease Ohcejogas, muitala Tapiola. Son oaivvilda ahte báikkálaččaid eai leat doarvái gullan dan áššis ja čujuha muhtun osiide evttohuvvon soahpamušas maid ii oaivvil hábmejuvvon vuoiggalaččat.

Nilla Tapiola

Nilla Tapiola lea ráhkkanan vuolgit maiddái politihkkára bargguid doaimmahit.

Foto: Jenna Rasmus/NRK

– Eananeaiggádat mat bohtet eará sajiin leat ođđa guolástanjoavku ja dál orro geavvamin dan láhkai ahte sidjiide áigot addit eanet guolástanvuoigatvuođaid.

Nilla Tapiolas lea gohttensadji Ohcejoga gilis gos idjadit olu turisttat geasi áigge.

– Sii hirbmat olu hállet dán Deanu soahpamuša birra ja máŋggas lea lohkan ahte orro nu váttisin šaddamin guolásteapmi dan ođđa soahpamuša mielde ahte sáhttá dát lea maŋimuš geassi go sii leat dáppe, muhto ferte dieđusge oaidnit mo geavatlaččat doaibmagohtet dat njuolggadusat, čilge Tapiola.

Várre áiggi alcces ja bivdui

Go deaivvadat Nillain, lea son justa fitnamin ruovttus ja divodeamen fanasmohtora olgovisttis.

Son čájeha lávkka mas oidnojit báhpirat ja bohkosa ahte lea ná ráhkkanan vuolgit maiddái politihkkára bargguid doaimmahit.

Vaikko eanáš áigi su geasis mannáge dasa go turisttaiguin bargá, de fuolaha son goittot ahte ieš maid háhppeha luosaid bivdit.

– Guokte vahku mun láven váldit luomu ja rievtti mielde ásan dalle johkagáttis ja bivddán luosaid. Dat lea okta dakkár áigodat go mun lean várren áiggi nu ahte ieš maid beasan leat joga alde.