NRK Meny
Normal

Luohti skádjagoahtá «Beakkálmasaid gilvvus»

Čakčat gullogoahtá luohti vuosttaš geardde beakkán «Stjernekamp» nammasaš guoimmuhanprográmmas NRK:s.

Stjernekamp 2017 STJERNEKAMP 2017

Artistat geat leat mielde dán jagi Stjernekamp gilvvus: Badjin gurut bealde: Benedicte Adrian, Adam Douglas, Ida Maria, Erlend Bratland ja Lisa Børud. Vuollin gurut bealde: Gaute Ormåsen, Didrik Solli-Tangen, Aleksander Walmann ja Makeda. Hilde Lyrån ii sáhtán oassálastit govvii.

Foto: Julia Marie Naglestad / NRK

Stjernekamp lea NRK guoimmuhanprográmma mas logi beakkán Norgga artista hástaluvvojit gilvalit iešguđetge musihkkasurggiin, surggiin main eai soaitte leat nu beare oadjebasa.

Prográmma álgá borgemánu 26 beaivvi ja luohtesuorgi sáddejuvvo TVs golggotmánus. Lea viđát geardi go Stjernekamp sáddejuvvo NRK:s, dábáleamos suorggit gilvvus leat omd. Opera ja Hip-hop.

DJ Vibeke

Vibeke Sørlie dat lea Stjernekamp «eadni». Son lea maiddái norgga hip-hop koreográfa, dahje dánsahábmejeaddji.

Foto: Espen S. Røst / NRK

– Viimmat lea luohti mielde

Stjernekamp álggaheaddji ja mielbuvttadeaddji, Vibeke Sørlie muitala ahte dán jagi leat reaggae ja luohti ođđa suorggit gilvvus.

– Mii leat jo máŋga jagi háliidan ahte luohti galggašii leat oassin Stjernekamp gilvvus, muhto easkka dán jagi de ollašuvai dat, muitala Sørlie.

Son maid sáhttá muitalit ahte okta sivva dahje inspirašuvdnan go luohti šattai Stjernekamp suorgin, lea NRK Sámi mannan dálvve guoimmuhanprográmma «Muitte mu - Husk meg». Doppe oidnui ja gullui čielgasit man bures luohti doaibmá TVs.

Geat juoigamis galget bagadit beakkálmasaid, ii dáhto Vibeke Sørlie vuos kommenteret.

Artister og joikere fra serien Muitte mu - Husk meg

«Muitte mu» oassálastit: Gurut bealde govas: Nosizwe Baqwa ja bagadeaddji Johan Anders Bær, bagadeaddji Berit Alette Mienna ja Øystein Dolmen, Tuva Syvertsen ja bagadeaddji Frode Fjellheim, Margaret Berger ja bagadeaddji Ánde Somby, Elisabeth Andreassen ja bagadeaddji Sárá Mariell Gaup Beaska, Grutle Kjellson (bagadeaddji Maxida Märak ii leat mielde govas.)

Foto: Johan Mathis Gaup / NRK

«Muitte mu - Husk meg» lea musihkkaprográmma man olis guhtta beakkán Norgga artistta galge golmma beaivvis oahppat juoigat, ja loahpas de lávddal rohttehit su geasa luođi bidje. Sin bagadeaddjit ledje beakkán sámi artistat.

Ođđa vásáhus

Okta guhte lea mielde dán jagi Stjernekampas, lea Didrik Solli-Tangen. Su mielas lea earenoamáš gelddolaš go luohti maid lea oassin dán jagi gilvvus, ja lohká šaddat sutnje áibbas ođđa vásáhussan.

Didrik Solli-Tangen møter pressen etter finalen i MGP 2010

Didrik Solli-Tangen lea earret eará ovddastan Norgga, Eurovision Song Contest gilvvus 2010s, lávlagiin «My heart is yours».

Foto: Birte Njøsen Horne / NRK

– Lea diehttelasat nu ahte luohtesuorgi lea easka veahá maŋŋelis gilvvus, muhto sávvamis ceavzzán dassážii go gálggašeimmet juoigat, de beasašin oahppat ja bagaduvvot luođis.

Luohtái olu dovddut čatnon

Didrik lohká gullan ahte luohtái leat čatnon olu dovddut, dasto heivege dat sutnje hui bures ja illuda dasa. Son ii leat goassige aktiivvalaččat juoigan, muhto son lea ruovttus veahá gal huradan.

– Luohti ii leat gal juoga maid son eanemusat guldala, Didrik Solli-Tangen vuige.

Movt áiggot ráhkkanit luohtesuorgái?

– Mun ferten dieđusge guldalit luđiid, geahččalit áddet mii luohti duođaid lea. Diehttelasat buot surggiide gilvvus ferte veahá čiekŋudit, muhto balan juoigama šaddat okta dain váddáseamos surggiin, sivas go dat lea eatnašiidda hui amas, Solli-Tangen árvala.

Gártet hoahpus oahppat

Nils Johan A. Gaup

Juoigalasat searvvi álggaheaddji ja jođiheaddji, Nils Johan Gaup lea eahpádusas.

Foto: Liv Inger Somby/NRK

Juoigalasat searvvi jođiheaddji, Nils Johan Gaup ii loga vel sáhttit dadjat mearkkašumi das go luohti maid gullogoahtá Stjernekamp gilvvus čakčat.

Son dadjá artistat šaddet hoahpus oahppat juoigat, dasto ii leatge sihkar ahte ohppet dat mii dárbbašuvvo luođi ektui. Danin lea eahpádusas, ahte leago buorre vai heitot go gilvvus lea dál maiddái luohti suorgin.