Joganjálmmi girkus Álttás ledje ollu lieđit, muhto lei musihkka mainna Inga Juuso, guhte lea badjel 40 jagi ovddidan luođi miehtá máilmmi, muittašuvvui.
Artisttat Mari Boine, Steinar Raknes, Patrick Shaw Iversen, Klemet Anders Buljo ja
Elin Kåven dahke maŋimuš earrodearvvuođaid musihkain ja luđiin Inga Juusoin, gii jámii ovddit lávvardaga.
Ollu giitosat
Muitosániin deattuheddje Inga Juuso áŋgiruššama luođi ovddidemiin, muhto maiddái man liekkus ja várrugas olmmoš son lei, ja movt son illudii boahtit ealáhahkii. Dalle áiggui bidjat buot iežas áiggi bearrašii ja lagamusaide.
Juuso lei vuosttaš ja áidna fylkkajuoigi. Ovddeš bargoaddit, Romssa fylkkasuohkan ja Beaivváš Sámi Našunálateáhter, giite Juuso su barggu ja rahčamušaid sámi kultuvrra ja luođi ovddas.
Sámedikki bealis ges ráđđelahttu Silje Karine Muotka giittii olles sámi servvodaga ovddas.
Sámi stáhtačálli Anders Bals ges ovddastii ráđđehusa hávdádusas.
Sámi árbevirolaš kulturguoddi
Inga Juuso jámii borgemánu 23. beaivve, 68 boarisin, maŋŋá guhkes áiggi buozalmasvuođa.
Inga Juuso guhte lei bajásšaddan Guovdageainnus, gearggai buvttadit ollu musihka vuovdimassii, ja barggai ovttas máŋga dovddus artisttaiguin.
Barggu ovddas son oaččui máŋga bálkkašumi, earret eará Spellemannsbálkkašumi Bárut nammasaš joavkkuin.
Inga Juuso lea leamaš ovdagovvan maiddái sámi artisttaide. Mari Boine lea máŋgga oktavuođas muitalan ahte son juoigagođii Juuso geažil.