NRK Meny
Normal

Luohteberošteaddji ii leat mielas go luohti lea fáddán «Stjernekamp»- gilvvus

Čakčat gullogoahtá luohti vuosttaš geardde beakkán «Stjernekamp» nammasaš guoimmuhanprográmmas NRK:s.

Åsá Márgget Anti med hunden sin Guvge

Luohteberošteaddji, Åsá Márgget Anti atná dan hui unohassan ahte earát go sápmelaččat ovddidit luođi beakkán TV-prográmmas.

Foto: Privat

«Stjernekamp» buvttadeaddjit leat mearridan hástalit oasseváldiid juoigamis dán jagáš gilvvuin. «Stjernekamp» ovddasvástideaddji Petter Wallace, ii gal jáhke juoigama šaddat bogostahkan, muhto baicca nanne luođi posišuvnna.

Ii ovttaoaivilis

Dasa ii leat luohteberošteaddji, Åsá Márgget Anti veahášge ovttaoaivilis. Son dadjá ahte lea dieđusge buorre go luohti čalmmustahttojuvvo ja gullo viidát máilmmis, muhto dat ii oro su mielas mange veara ahte earát go sápmelaččat galget luođi ovddastit ja ovddidit dan máilbmái.

Stjernekamp 2017 STJERNEKAMP 2017

Artistat geat leat mielde dán jagáš «Stjernekamp» gilvvus: Badjin gurut bealde: Benedicte Adrian, Adam Douglas, Ida Maria, Erlend Bratland ja Lisa Børud. Vuollin gurut bealde: Gaute Ormåsen, Didrik Solli-Tangen, Aleksander Walmann ja Makeda. Hilde Lyrån ii sáhtán oassálastit govvii.

Foto: Julia Marie Naglestad / NRK

– Luohti lea sápmelaččaid buvtta, dat lea dego min kultuvrra dovdomearka. Ii luohti leat dušše musihkka, dat lea maid min gulahallanvuohki mas lea olu čiekŋalat sisdoallu go dušše «hoi-lás-tit», muitala Åsá Márgget.

– Luohti, dušše sápmelaččaide?

Petter Wallace

«Stjernekamp» ovddasvástideaddji, Petter Wallace.

Foto: Ekroll, Anne Liv / Anne Liv Ekroll, NRK

«Stjernekamp» ovddasvástideaddji, Petter Wallace ii loga iežas ovttaoaivilis Antiin, ahte luohti lea dušše sápmelaččaid várás, ja ahte earát eai galgga dan sáhttit ávkkástallat.

– Lea mearehis dehálaš ahte mii leat rahpasat, ja čájehit movt luođi sáhttá ávkkástallat. Makkár árvu das lea, ja dalle eai ábut leat dákkár gáržžideamit, dieđiha Wallace.

Wallace oaivvilda ahte «Stjernekamp» galgá vuollegašvuođain ovdanbuktit luođi gilvvus. Son ii oainne váttisvuođa ávkkástallat luođi, ja deattasta ahte gilvvus leat čeahpes olbmot geat bagadit beakkálmasaid juoigamis.

  • Olles jearahállama sáhtat dás gullat: