Áirra bellodaga Sámediggeáirras, Láilá Susanne Vars lea mearridan luohpat doaimmas Sámedikki politihkkarin. Vars lea válljejuvvon 2013 - 2017 áigodahkii, muhto lea dieđihan ahte son ohcá beassat politihkkalaš doaimmas dán valgaáigodaga lohppii, čállá áviisa Ságat.
Láilá Susanne Vars válljejuvvui Sámediggái vuosttaš geardde 2009 válggain. Ja Sámedikki vuođđudeamis son válljejuvvui Sámedikki várrepresideanttan. Jagi 2013 son nuppes válljejuvvui 2013-2017 áigodahkii.
Gáldu direktevran
Seammásgo Láilá Susanne Vars lei Sámediggeáirras, de son jagi 2013 nammaduvvui Gáldu - Álgoálbmotvuoigatvuođaid Gelbbolašvuođaguovddáža direktevran.
Sámediggepresideanta, Aili Keskitalo ja Bargiidbellodaga parlamentáralaš jođiheaddji, Vibeke Larsen leaba máŋgii imaštan makkár rollas Láilá Susanne Vars ságastallá, gáldu direktevran ja sámepolitihkkáriin.
Šattai válljet
Jagi 2015 mearridii Stuorradiggi sierralága bakte ásahit Norgga Nationála Olmmošvuođaid Ásahusa, (NIM). Dat lea áibbas iešheanalaš ásahus man bargun galgá leat gozihit vejolaš olmmošvuoigatvuođaid rihkkuma. Maŋŋil go NIM ásahuvvui, de bargagohte dan badjelii ahte Gáldu galggai sirdojuvvot NIM vuollái. NIM bealis dadje ahte sii dárbbašit dan gelbbolašvuođa mii Gáldus lea. Nu dajai NIM direktevra, Petter Wille NRK Sápmái árabut dán jagi.
Šiehttan bargiiguin
NIM stivra ja gáldu stivra leat šiehtadallan ášši, ja leat mearridan ahte Gáldu doaivumis 2016 čavčča mielde sirdojuvvo NIM vuollái. NIM stivrajođiheaddji, Cecilie Østensen Berglund, dajai árabut dán jagi NRK Sápmái ahte NIM stivra doaivumis šaddá mearridit ahte bargit geat maiddái leat politihkkarat fertejit válljet, joatkit bargin dahje luohpat politihkkas.
Maiddái gozihit Sámedikki
Østensen dajái NRK Sápmái ahte go NIM galgá leat áibbas friddja ja iešheanalaš ásahus, de sii eai sáhte diktit bargiid joatkit politihkas mii fas sáhttá sidjiide dagahit váttisvuođaid. Cecilie Østensen Berglund lea árabut čilgen NRK Sápmái ahte go sii maiddái galget gozihit Sámedikki barggu ja doaimma olmmošvuoigatvuođai ektui, de lea čielggas ahte sin bargit eai sáhte seammás maiddái doaibmat Sámedikki politihkkarin.
Lunddolaš mearrádus
– Lei áibbas lunddolaš ahte Láilá Susanne Vars lea mearridan luohpat politihkas.
Nu dadjá bargiidbellodaga parlamementáralaš jođiheaddji Vibeke Larsen, ja lasiha ahte Vars han ii sáhte leat Sámedikki áirras, seammás go Gáldu ovddas galgá gozihit rihkku go Sámediggi olmmošvuoigatvuođaid.
