NRK Meny
Normal

Luođit attášedje iešdovddu

Mátta-Várjjagis leat dál ohcagoahtán ja kártegoahtán iežaset guovllu luđiid. Dát attášedje dálá buolvvaide iešdovddu.

Luohteprošeaktabargi Elin Magga
Foto: Anne Olli / NRK

Mátta Várjjat gielda lea ožžon Norgga kulturráđis ruhtadoarjaga kártegoahtit Mátta-Várjjat luđiid. Gielda lea doaimma bidjan Mátta-Várjjat museai, ja doppe lea prošeaktabargi Elin Magga bargamin dáinna. Son galgá kártet Mátta-Várjjat luđiid.

Kulturárbi loktešii iešdovddu

Luohteprošeaktabargi Elin Magga
Foto: Anne Olli / NRK

Prošeaktabargi Elin Magga muitala nuoraid Mátta-Várjjagis ohcalit juogalagan kulturárbbi mii duođaštivčče ahte sin guovllusge lea leamaš ealli sámi biras. Luođit leat ovddeš áigge gullon sin guovllus, muhto dál dat eai šat gullo, danne lea dehálaš ohcat dáid ja registreret dáid.

Gullogoahtit fas

Mátta-Várjjat museas áiggošedje dološ luđiid čohkket. Dáid hálidivcce sii čájáhussan bidjat, duođaštussan ahte singe guovllus leat luođit gullon. Ainnas sii daid bijašedje gullanláhkai, nu ahte sii geat daid hálidivčče gullat beasašedje dan dahkat sin museas. Eai dán áigge šat gallis juoigga almmolaččat sin guovllus.

Ohcá juoigiid

Elin Magga muitala luohteprošeaktabarggus maid ohcat juoigiid Mátta-Várjjagis. Son illá jáhká ahte sin guovllus eai šat gávdno juoigit. - Gal varra muhtimat máhttášedje, himáhallá son. Justa dáid olbmuiguin dáhtošii son oktavuođa. Sii livčče leat riggodahkan, go justa sii sáhtašedje duođaštit ahte Mátta-Várjjagis ain eallá luohti. - Dát livčče leat sámi nuoraide nana duođaštussan sin sámi duogážii, lohká Mátta-Várjjat luohteprošeaktabargi Elin Magga.

Gula ášši ja luđiid