NRK Meny
Normal

Luđiin dearvvaha

Anna Galmaja Johnsen dearvvaha olbmuid luđiin. Son rohtteha su, dahje su lagaš olbmo luođi, gean dearvvaha.

Anna Galmaja Johnsen

Anna Galmaja Johnsen

Foto: NRK

Nuorran son lea oahppan juoigat. Son muitala iežaset dalle nuorran juoigan olbmuid, dan sii dahke áigegollun. Nu leage son ovddešáigge luođiid darvehan. Luođit leat álo hui lahkosis, dát beare bohtet.

Rohtteha mu eatni

Go čákŋalan su dállui de gulan su juo juoigamin mu eatni. Ná dahká son álo go deaivvada muinna. Ja nu dahká son go deaivvadea earáiguinge.

Luohti maid muittuha

Anna Galmaja Johnsen šaddá guhkes jurdagiidda go jearan ahte boktet go luođit sus makkárge dovdduid. Loahpas mieđiha, lohká dáid boktit sihke buriid ja maiddái váivves muittuid. Diehtalasat lea maid luđiide čihkkon ráhkesvuođa dovddut, dajalasttá son.

Luođit gurgalit go muittaša

Mun jearadan Anna Galmaja Johnsenis ovddeš áiggis. Son geahčasta glásas olggos, nuppe beallái joga ja nu gurgalit luođit, okt` nuppi maŋis. Son ii dárbbaš eanet go oaidnit guovlluid gos dat olbmot ásse geaid luđiid son nuorran lea oahppan.

Buohkat eai liiko luđiide

Fáhkkestaga mojiha son ja muitala ahte eai buohkat gal liiko luđiide, lohket su leat suruheapmin go juoiga, muhto ii son das gal beroš. Earátges movttiidit go son luđiin dearvvaha sin.

Son dearvvaha olbmuid luđiin