NRK Meny
Normal

Lohpida gelddolaš festivála

Girječálli Hamsun lea okta dain, geat hábmejedje girjjálašvuođa Norggas. Festiválas beassa deaivvadit maid sámi girječálli Sigbjørn Skådeniin.

Hamsun
Foto: Knut Folkestad / NRK

Hamsun-beaivvit álget duorastaga. Festivála lea okta Norgga boarráseamos kulturfestiválain, gos lea ulbmil čájehit sihke girjjálašvuođa, musihkka, teáhtera, dáidaga ja álbmoteallima. Hamsun-beivviid stivrrajođiheaddji Bodil Børset lohpida gelddolaš festivála.

Børset muitala, ahte dát kulturfestivála lágiduvvo juohke nuppi jagi Hápmiris. Festivála álgá duorastaga ja bistá boahtte vuossárgii. Vuossárgga lea ge 4. Beaivi borgemánus, mii lea Knut Hamsuna riegádanbeaivi. Dál niegada Børset sáhttit lágidit festivála juohke jagi.

Sámi perspektiiva

1980-logus lei dáhttu álggahit festivála, mas lei ulbmil ávvudit čálli Knut Hamsun. Hamsun riegádii 1859 ja jámii 1952. Girječálli Hamsun lea okta dain, geat hábmejedje girjjálašvuođa Norggas. Festiválas lea maid sámi perspektiiva. Sámi girječálli Sigbjørn Skåden lea okta dain, geain festivála guossit besset deaivat.