NRK Meny
Normal

Ohcalit lohkan ja čállinveahki

Sámediggi bivdá eiseválddit ásahit lohkan ja čállinveahki vuorraset sápmelaččaide.

Karen Marie Kemi Buljo og Inger Marie Gaino

- Lohkan ja čállinveahki lea leamaš buorre fálaldat Guovdageainnus, lohkaba Karen Marie Kemi Buljo ja Inger Marie Gaino.

Foto: Marie Elise Nystad

Vuorraset sápmelaččaide sáhttá leat hástalus váldit oktavuođa almmolaš ásahusaiguin vieris gillii ja ođđaáigásaš rusttegiiguin. Dan dihte bivdá Sámediggi eiseválddit ruhtadit lohkan ja čállinveahki, gii sáhtášii veahkehit vuorraset olbmuid sámi suohkaniin.

– Mis leat buolvvat geain ii leat leamaš nu nanu skuvlejupmi soađi geažil, ja dasalassin lea dáruiduhttin čuohcan garrasit,lohká sámediggeráđđelahttu Silje Karine Muotka.

– Dárbu lohkán ja čállinveahkkái

Guovdageainnus lea leamaš dákkár fálaldat geahččalanprošeaktan golbma jagi man Sámediggi lea ruhtadan.

– Prošeakta čájeha ahte lea dárbu dákkár fálaldahkii, go olu vuoras sápmelaččat dárbbašit veahki go galget váldit oktavuođa almmolaš ásahusaiguin, muitala Guovdageainnu suohkana bargoveaga jođiheaddji Karin Hætta.

Son muitala ahte fálaldat lea doaibman hui bures, ja jamma leat leamaš olbmot geat leat dárbbašan veahki.

– Erenoamážit vuorraset olbmot leat bivdán veahki, jus omd eai leat ipmirdan sisdoalu reivviin maid leat ožžon. Muhtinat dárbbašit veahki riŋget báŋkui, ja earát fas eai soaitte hálddašit dihtoriid, muitala Hætta.

– Almmolaš ovddasvástádus

Dát geahččalanprošeakta loahpahuvvui diibmá, ja oallugat leat ohcalan dán fálaldaga.

– Dat lei buorre fálaldat miidjiide, dat gal fertešii fas boahtit johtui, lohká Inger Marie Gaino.

Dan dihte áigu Guovdageainnu suohkan fas álggahit lohkan ja čállinveahki, ja leat dál ohcame olbmo 50 proseanta virgái.

Sámediggi dat lea ruhtadan geahččalanprošeavtta Guovdageainnus. Dál bivdá Sámediggi stáhta váldit ovddasvástádusa ja ruhtadit dákkár bálvalusa.

– Dákkár bálvalus lea almmolaš ovddasvástádus, ja nu ferte maid ruhtaduvvot almmolaš ruđaiguin, lohká Muotka.