Illá son muitigođii mánnávuođastis maidige, muhto de muitái mo dalle lei, daid juovllaid go son goarkabissu oaččui juovlaskeaŋkan.
Goarkabissu juovlaskeaŋkan
Goarkabissu lei son hálidan juovlaskeaŋkan, ja nu son oaččui dan maid lei hálidan.
Juovlabasiid diehtalasat vulggiiga vánhenguovttos girkostallamiidda, ja son ii bággehallan dalle vuolgit mielde. De beasaige son leahkit ruovttus, ja dalle lei diehtalasat buorre liiba geahčadit juovlačiŋáid ja skeaŋkkaid.
Skealbmamojiiguin muittaša NRK Sámi Radio hoavda Nils Johan Heatta iežas mánnávuođa juovllaid. Loddet maid geahččalii son juovlabasiid.
Ovdalaš juovllaid leigga su vánhemat finadan suomabealde, nugo leige vierru dan áigge. Ja doppe leigga oasttán čáppa juovlačiŋaid. Erenoamaš čáppa čiŋaid leigga oasttán juovlamurrii. Dat ledje hui čáppá lottit maid cikcestii gitta juovlamurrii. Ja duođai čalbmáičuohci ledje dát lottit, muittuhedje beanta lottiid maid giđđat lávejedje olbmot báhčit.
Iskkai loddet juovlabasiid
Loddema lei su mielas somá oaidnit, danne songe háliidii geahččalit loddet.
Son galgalii goarkabissus bátti masa goarka lei giddejuvvon, ja nu son válddii stilleda uksagaskii ja bávkalii. Deaivil son han vel lei, go gearggai máŋga lotti báhčit juovlamuoras, muhto dát lottit dat gal cuovkanedje áibbas. Nu fertiige čorgestit eret buot ovdalgo vánhenguovttos máhcaiga ruoktot.
Nie muittaša Nils Johan Heatta iežas mánnávuođa juovlavásáhusa.