Logi beaivvi guhkosaš bivdu álgá bearjadaga.
Guovdageainnu suohkan ja Sámi bivdo- ja meahcástansearvi leat geahččalan oažžut lobi bivdit seamma lágan lottiid go muđui čakčat báhčet muhto eai leat ožžon dán rádjái.
Loddejeaddjit eai leat duhtavačča
Mannan bearjadaga ledje suohkanii boahtán 75 bivdoohcamuša.
Sámi bivdo- ja meahcástansearvvi jođiheaddji Johan Ingvald Hætta lohká fertet duhtat dasa ahte dál besset dušše báhččit duorššu, fiehtaga ja goalssi, loddejeaddjit eai leat duhtavačča go eai beasa báhčit seamma čáhcelottiid go čakčat.
Guovdageainnu suohkan ja Sámi bivdo- ja meahcástansearvi lea geahččalan oažžut eiseválddiid oažžut mielde rievdadit makkár lottiid Guovdageainnus galget beassat bivdit dál giđđat. Muhto eiseválddit eai leat dohkkehan dan, dán rádjái.
Politiijat áigot čuovvut mielde
Boazopolitiijat galget dárkkistit loddejeddjiid dán jagáš loddema. Hætta mielas lea buorre go bearráigeahčču čađahuvvo go nu lea maid nugo ealgabivddus, ja son jáhkká maid ahte loddejeaddjit bivdet dušše daid lottiid maid eiseválddit leat juolludan.
Guovdageainnu biras- ja meahcástankonsuleanta Marit Inger Bongo muitala ahte bivdoáigi lea dán mánu 30. beaivvis gitta geassemánu 8. beaivái. Odne dahje ihttin dat vuorbáduvvo makkár lottiid juohke bivdi beassá báhčit ja galle lotti juohkehaš oažžu.