Porsáŋgguvuona sulluin gillájit hávddat garrasit danin go gázzalottit, ja earenoamážit mearragoaskimat borret hávdamoniid, čivggaid ja muhtumin vel hávddaid ge. Nu muitalit mearrasápmelaččat geat ásset Porsáŋgguvuona oarjjabealde. Diibmá eai lean hávdačivggat oppage oaidnimis Stuorra Játká sulluid birra, lohká Hans Oliver Hansen gii ássá Goarahagas.. Hávddat monnejit muhto dasa ii leat ávki go mearragoaskimat váldet ja borret hávdamoniid, lohká son.
Loddečeahppi badjelgeahččá mearrasápmelaččaid čuoččuhusaid
Norgga Ornitologa searvvi fágahoavda Ingar Jostein Øien ii gal loga dovdat mo dilli sulluin lea muhto lohká ahte olles Porsáŋgguvuonas leat ollu hávddat mat monnejit. Ingar Jostein Øien ii loga duohtan ahte mearragoaskin borrá hávdamoniid muhto son duođašta gal ahte mearragoaskin muhtumin sáhttá ribahit borrat hávdačivggaid muhto dat ii leat gal dat borramš maid mearragoaskin beaivválaččat borrá. Mearragoaskin gávdná borramuša fiervvás, ja coahkásis gávdná goaskin meađđenguliid, lohká Norgga Ornitologa searvvi fágahoavda Ingar Jostein Øien. Juohke geasi fitná son Rávttošnjárggas iskamin mo giljobaččat Váldatjeakkis birgejit ja ovdánit ovdalgo girdilit duoddarii gosa monnejit.