NRK Meny
Normal

Lobihis mávssut gielddain

Lobihis mávssut dearvvasvuođabálvalusain miehtá Norgga.

Betalingsterminaler
Foto: JOHN MACDOUGALL / AFP

Miehtá Norgga leat dearvvašvuođaguovddážiiguin automáhttat, main sáhttá máksit doavttirrehkega. Máŋgga dákkáris lassin boahtá vel viđa ruvnnu divat, mii ii leat lobálaš, muitala dearvvašvuođadirektoráhta ossodathoavda Steinar Mathisen.

- Dearvvašvuođadirektoráhtta lea gávnnahan, ahte ii gávdno láhkavuođđu dán divvagii. Ollu pasieantat leat moaitán dán.

Steinar Mathisen
Foto: Thomas Lien / Helsedirektoratet

Lea Melin Medical fitnodat, mii láigoha dáid máksinautomáhtaid dearvvašvuođaguovddážiidda.

Oktiibuot 750 automáhtta leat dál Norggas. Miessemánus čájehuvvui, ahte 380 dáin automáhtain váldet dán lassi vihtta ruvnnu. Mathisen muitala, ahte gielddat dainna mákset láiggu dáid automáhtaid ovddas. Direktoráhta áigu dál váldit oktavuođa gielddaiguin.

Kárášjoga dearvvašvuođaguovddáš lea maid válljen divat ortnega. Kárášjoga organisašuvnna hoavda Lisbeth Faltin muitala, ahte lea gielddadoavttir, guhte dál lea luomus, gii ferte mearridit, maid sii galget dahkat divvagiin. Faltin lasiha, ahte go direktoráhta váldá oktavuođa, de áigu gielda geahčadit maid sii dahket áššiin.