Loahppaákkastallamat gii oamasta Kárášjoga
Otne álge loahppaákkastallamat meahcceduopmostuolus mas lea sáhka ahte gii oamasta Kárášjoga eatnamiid. ikte gerge vihtaniiguin geat leat čilgen movt sii leat ávkkástallan guovlluid ja movt sii leat juogadan guovlluid. Kárášjoga gieldda advokáhtta Caroline Lund dat álggii ákkastallat manne oaivvildit ahte eatnamat gullet Kárášjoga álbmogii, iige Finnmárkkuopmodahkii Fefo:i. Son čujuha earret eará dasa ahte Kárášjohka ja Sis-Finnmárku ii gullan Norgii ovdal 1751 ja ahte báikkálaš álbmot lei ásahan oamasteami guvlui ovdal dan. Sii gáibidit oamasteami ja geavahanvuoigatvuođaid Kárášjoga eatnamiidda, earret daid eatnamiidda mat gullet priváhta olbmuide. Maŋŋel Lund, lea Guttorm-joavkku advokáhtaid vuorru. Sii gáibidit ahte guovlu gullá sápmelaččaide. Loahpas lea Finnmárkkuopmodaga( Fefo)vuorru ges ákkastallat manne Kárášjoga eatnamat gullá Finnmárkkuopmodahkii. Diggi loahpahuvvo plána mielde bearjadaga.