– Jus Saras lea plána mot geahpedit ealu 75 heggii, de mii leat gergosat šiehtadit suinna ja nu maid lihkkidit maŋimuš áigemeari, mii dál lea juovlamánu 31. beaivvi.
Dán dadjá Eanandoallodirektoráhta direktevra Liv Berit Hætta. Dát direktoráhtta dat lea mii heiveha boazologu.
– Duopmu lea celkon
Stuoradikki opposišuvdna lei evttohan stáhta vuordit bággonjuovvamiin dassái go Ovttastuvvan našuvnnat leat gieđahallan ášši.
Muhto ikte mearridedje Norgga Stuoradikkis ahte eai maŋit bággonjuovvamiid.
- Les også:
Golggotmánus gáibidii Eanandoallodirektoráhta ahte Sara doahttala Alimusrievtti duomu unnidit boazologu. Sus eai oaččo leat eanet go 75 bohcco.
Sara lea váidán duomu ON:a olmmošvuoigatvuođalávdegoddái.
– Duopmu dán áššis lea celkon Norgga riektevuogádaga alimus dásis. Danin lea min boahtte lávki duhtadit dán, dadjá Hætta.
– Ferte doahttalit duomu
Ovddádusbellodat lea leamaš njunnošis gáibideamen ahte bággonjuovvamat čađahuvvojit.
Eanandoalloministtar Bård Hoksrud (Frp) ii hálit vuordit ON:a cealkámuša áššis.
– Mii fertet čuovvut Norgga riektevuogádaga. Stuoradiggi ásaha lágaid ja duopmostuolut bearráigehččet ahte mii čuovvut dáid.
– Alimusriekti lea árvvoštallan olmmošvuoigatvuođaid dán áššis. Danin ferte dál doahttalit dán duomu, logai Bård Hoksrud ikte Dagsnytt 18:s.
Hoksrud deattuha ahte dán ášši sáhttá čoavdit siskkáldasas stáda haga.
– Jus Sara ii geahpet ealus de lea vejolaš ahte earát su orohagas dahket dan. Su guovllus lea menddo ollu boazu.
Čájehit olmmošvuođa
Maiddái Norgga Sámediggi lea ávžžuhan Stuoradikki vuordit ON:a cealkámuša.
Sámediggepresideantta Aili Keskitalo lei sávvan politihkkariid váldit vuhtii dán.
– Mun ledjen vuordan ahte Stuoradiggi livčče čájehan olmmošvuođa dán áššis.
– Dađe bahát ievttá mearrádus čájeha ahte politihkkárat válljejit jáhkkit ahte departemeantta diehtá buoremusat.
Keskitalo ávžžuha Norgga ráđđehusa addit juovlaráfi Jovsset Ante Sarai.
– Mon ávžžuhan ráđđehusa bissehit bággonjuovvamiid dassái go ON lea gieđahallan ášši. Dása ii dárbbaš Stuorradiggemearrádusa.
NRK ii leat odne gávdnán Jovsset Ante Sara ságáide, muhto su oabbá, Maret Anne Sara, dadjá VGi ahte sii eai vuollán áššiin. Sii jotket doarrut sihke politihkalaččat ja juridihkalaččat.
- Les:
- Les: