NRK Meny
Normal

Lihkostuvve teáhterčájáhusain Troandimis

Deanu Sámi Mánáid Teáhtera nuorra neavttárat lihkostuvve čájáhusain Troandimis. ISAK nammasaš kulturvissus lei olu reaškkas go nuorat ledje lávddis neavttašeamen «Lohkat Nollii» bihtá.

Deanu Kulturskuvlla Sámi Mánáid Teáhtera neavttarat

Deanu kulturskuvlla Sámi Mánáid Teáhtera nuorra neavttárat

Foto: Anne Olli

Tråante 2017 doaluide searvvai maid Deanu kulturskuvla Sámi Mánáid Teáhter bihtáin «Lohkat Nollii». Teáhterčájálmasa lea Kristofer Grønskog čállán, ja čájáhusa bagadallin lea leamaš Ebba Joks.

Mokta ja reaškkas sálas go nuorat čájehedje iežaset eallimis

Muitalus muitaluvvui nu gohčoduvvon mosaihkka drámaturgiijain, ja das ledje logi oasi. Čájáhusas muitaledje dálá áiggis, vássán áiggis, ja boahtte áiggis. Neavttárat govahalle nuoraid eallima, ja diehttalasat lei dás sáhka ođđa áigásaš digitála rusttegiin nugo Iphonain ja Ipadain. Gulahallan geavai dáid ráhkkanusaid bokte.

Gehččiide lei čájáhus somá, go gullui olu reaškkas sálas, go duođai oidnui lávddis dat maid nuorat vásihit iežaset beaivválaš eallimis.

Muitalus gieđahállá maid duođalaš fáttáid

Májjá Sofie Johnsen ja Jovnna Levi Joks Vars

Májjá Sofie Johnsen ja Kristian Tapio dat gulloba jietnafiillas dalle go gánda ribaha gusa báhčit.

Foto: Anne Olli

Dihtosis lea ahte nuorat geavahit beaivválaččat sosiála mediaid, dáid bokte šáddá dávjá sáhka ráhkásmuvvamis, čiŋadeamis ja ruđas. Geavvá maid dávjá nu ahte dáid digitála ávdnasiid bokte maid suollemasat givssidit nuppiid. Ja dán čájáhusas geavvá maid báhčin, gánda ribaha báhčit gusa. Dan oktavuođas čuožžilit maid áššit maid nuorat ovttasráđiid geahččalit čoavdit.

Nuoraid neavttašeapmi hirpmástuhtii

Deanu Sámi Mánáid Teáhtera nuorra neavttárat neavttašedje oalle čehpet. Ii vuhtton eahpádus gokkoge, dajaldagaid beare gurgalahtte. Sin hállan lei bures ráhkkanahtton ovdalgihtii, nuorat dadje sániid oalle čielgasit ja njuovžilit.