Norgga Dramatihkkafestivála válljii árabuš dán jagi gávcci teáhterčájálmasa 76 sáddejuvvon teáhtergiehtačállosiid gaskkas. Okta dán lei Rauni Magga Lukkari čálus "Lihkošalmmái". Dán lea su bárdni, Petter Johanas Lukkari, jorgalan dárogillii.
Norgga Dramatihkkafestivála sáddii buot gávcci giehtačállosiid norgga teáhteriidda ja Našonálateáhter liikoi Lukkari čállosii nu bures, ahte sii hálidedje buvttadit dan.
Oftebro monologa
Čakčamánus lei vuosttaščájálmas ja Lihkošalbmá neavttašii dovddus neavttár Nils Ole Oftebro. Eadnin ja juoigin lei Inga Maarit Gaup-Juuso. "En lykkens mann" čájehuvvo Našonálateáhteris boahtte jagi giđđadálvve maid. Ja Beaivváš Sámi Teáhter áiggošii sámegillii čájehit dán teáhtermenestusa.
Lihkošalmmái lea 60-jahkásaš ja lea bajásšaddan Suoma beale Deanuleagis. Son lea eallinagis ássan váhnemiidis luhtte. Muitalusa mielde galgá su eatnerohkki gáskán su njuoratmánnán vai bisošii ruovttus.
Árvvoštallit rámidit
Klassekampen čálii árvvoštallamistis, ahte "Lihkošalmmái" lea guovttebotnat ja máŋggagearddat teaksta. Das lea munnás, stáđis ja rikkis giella. Bihtá olgguldasat, naivvalaš ja objektiivvalaš muitalanvuohki addá sierra dáhpáhusaide sihke liekkusvuođa, garravuođa ja doaivmus maid komihka.
Dán čállá Aftenposten: "...healludahtti teáhterteaksta Deanuleagis čoaskačuolat bajásšaddama birra".
Vårt Land: "...vuosttaš geardde beassá sámi teáhterbihttá Našonálateáhtera lávddi ala. ...lihkolaš diibmu teáhteris:"
