Jus Ruota oaivegávpoga Stockholmma bokte áiggošit johtit dán jagi Liet-Lávlut loahppagilvvuide, mat lágiduvvojit Luvlajis golggotmánu 18. beaivve, de lea lágideaddjiin fálaldat mii dutnje lea jurddašuvvon.
Interneahttasiidduineaset lágideaddjit fállet dál páhkkamátkiid Eurohpá unnitgielaid lávlongilvvuide. 2500 Ruota ruvnnu ovddas oaččot girdi Stockholmmas Luvlajii ja ruovttoluotta, ija hotelles duppallanjas, bileahta Liet-Lávlut loahppagilvvuide ja bileahta festii mii dollo gilvvuid maŋŋá.
Viđát geardde
Liet-Lávlut lágiduvvojit viđát geardde ja Sápmi leage dáid musihkkagilvvuid vuoitán golbmii maŋŋalaga. Sápmelaš vuoitit leat Frode Fjellheim, Niko Valkeapää ja Johan Kitti/Ellen Sara Bæhr.
Loahppagilvvut lágiduvvojit dan guovllus mii vuittii maŋimuš loahppagilvvuid ja Sápmi leage maŋimuš vuoiti. Dán jagi "Liet-Lávlut" loahppagilvvuid lágida Ruota doaimmahat unnitgeavahuvvon gielaide (SWEBLUL, Swedish Bureau for Lesser-Used Languages).
Sámi ovddasta dán áigái lávlu/ártista gii lea vuoitán maŋimuš jagi Sámi Grand Prix. Dán jagi vuoiti šattaige kárášjohkalaš Elin Kåven lávlagiin "Áibbas jaska".