– Mun gal in doama lonuhit dálvedeahkaide ovdal go lea dárbu, muitala Nils Espen Rasmussen, Circle K bensinstašuvnna jođiheaddji Kárášjogas.
Sin kundarat smihttet nu go son ge. Rasmussen dadjá ahte sii čuvvot eambbo mielde dálkedieđáhusa, eai ge gille lonuhit deahkáid nu guhká go lea bivval.
– Olbmot bohtet dávjá molsut deahkaid go leat vuolgimin guhkebuš mátkái nugo Levdnjii, Áltái jna.
Muhtumat bohtet beaivvi ovdal, earát gis seamma beaivve go vulget vuodjit dobbelii márkanis, čilge Rasmussen gii lea juo vihtta jagi molson deahkaid.
Seamma olbmot
Nils Espen lea vávján ahte dat seamma olbmot fitnet molssuheamen deahkaid sin luhtte jagis jahkái.
– In ádján lonuhastit go sáhtan loktet olles biilla oktanaga.
Buoret piikadeahkat
Vuordináigi sáhttá leat guhkit jus áiggoš áibbas ođđa dálvejuvllaid, dalle fertejit diŋgot juvllaid. Rasmussen ávžžuha vuodjit ođđa piikajuvllaiguin veaháš áigge asfálttas.
– Dalle darvehit piikkat buoret muohtageidnui.
Ihkku galmmas
Muhto berrešit go olbmot dál molsut dálvedeahkaide? Mii leat riŋgestan Meteorologa Instituhttii Romsii gullat mo dálki lea dáid beivviid.
Mearragáttis leat lieggaceahkit, muhto Finnmárkku sis-eatnamis leat idjagalmmat mat sáhttet dagahit gálja geainnuid iđđedis.
– Ávžžuhan lonuhit dálvedeahkaide go sáhttá leat gálja iđitbeallai, čilge Ida Fossli Meteorologa Instituttas Romsas.