NRK Meny
Normal

Lea ilolaš go beassa lávlut

Anna Ellinor Hansrud lea nuorra nieida gean stuorámus sávaldat lea beassat lávlut Idolas. Iežas muitala leat lávlugoahtán ovdalgo go hállagođii, nu dat leat muitalan sutnje. Dál vázzá son musihkka-, dánsun- ja Drámalinnjá Áltta joatkaskuvllas.

Anna Ellinor Hansrud
Foto: Anne Olli

Anna Ellinor Hansrud lea bajásšaddan Ávanuoris ja Billávuonas. Iežas konfirmašuvnnas lávllui son moadde sálmma girkus, ja son lea maid lávlun olu eará doaluin. Earret eará lea son lávlun «Elieser» skiippas, mii gullá mearra-albmáid mišuvdnii, «Den indre sjømannsmisjon». «Elieser» lea skiipa mii johtá Norgga rittu, ja skippas leat kristtalaš doalut. Ja gos dal dát skiipa leaš kájjas, de leat olbmot bures boahtimat finadit skippas.

Vážžá skuvlla Álttas

Anna Ellinor Hansrud lea farga 17 jagi boaris. Skuvllas Álttás oahppá son neavttašit ja maiddái lávlut. Dán oahppolinjjá hálidii dieđusge danne go hálida oahppat neavttašit, ja maiddái mo jiena galgá liggedit ovdal go lávlugoahtá. Ja dieđusge oahppá maid mo jiena geavaha go lávlu.

Iežas muitala lávlut skuvllakoaras, ja dange lohká leat somán. Muhto ii Anna Ellinor Hansrud vuos dieđe maid son boahteáiggis dagašii.

Nordlyskátedralas beasái lávlut

Anna Ellinor Hansrud

Anna Ellinor Hansrud lávllui girkus mii dás su duogábealde oidno, Nordlyskátedrála.

Foto: Anne Olli

Anna Ellinor Hansrud muitala iežas maid lávlut sálmmaid, danne manaime Nordlyskátedralii, doppe girkobargi divttii Anna Ellinora lávlut, muhto sámegielsálbmagirjji ii gal gávdnan, danne Anna Ellinor Hansrud lávllui dárogillii «O Ipmilan/ O store Gud». Dan gulat jearahallama loahpageahčen.