NRK Meny
Normal

Lávdepoehta gurgalii poesiijas Sámedikki girjjálašvuođadeaivvadeamis

Lávdepoehta ja aktivistta Mimie Tim Märak geasuhii olbmuid iežas poesiijain. Máŋggas sihkko maid gatnjaliid go son gurgalii sániidis lávddis.

Mimie Tim Märak

Mimie Tim Märak lea lávdedáiddár ja aktivista. Son hállá áššiin main earát illá sáhttet hállat. Duođalaš áššiin hábme poesiija, ja de buktá son dáid ovdan iešguđetge oktavuođain.

Foto: Anne Olli

Mimie Tim Märak

Mimie Tim Märak ovdanbukta dá iežas ságaid, muitala iešsorbmemiin. Lohká jos son ii das hála, na gii de hálašii das rahpasit, nu og son dahká.

Foto: Anne Olli

Mimie Tim Märak bargá áššiin mat ovddidivčče sámiid beroštumiid. Lávdedáiddárin politihkke poesiija bokte. Son leage poehta, eamiálbmotfeminista ja sámi queeraktivista.

Iežas lohká bargat eamiálbmogiid ovddas. Ja poesiija bokte son ovdanbuktá váikke makkáraš áššiid, sihke lossa ja ilgadis áššiid.

Märak ii loga goassige diehtit mas áigu hállat ovdalgo oaidná olbmuid geat leat báikkis dahje sálas gos galgá lávdái. Danne ii leat son čállán maidige, ja sus ii leat makkárge čálus mas oainnášii teavstta. Son muittu mielde ovdanbuktá buot maid áigu almmuhit.

Ovdanbuktá oaiviliiddis ritmalaš vugiin

Dina Skotnes Johnsen

Álttá joatkaskuvlloahppi Dina Skotnes Johnsen lei illudan gullat Märaka, ja lohkáge lean stuorra vásáhussan beassat gullat su.

Foto: Anne Olli

Ritmalaš poesiijain muitala lossa áššiid birra nugo veagalváldimiin, iešsorbmemiin ja vealahemiin. Son ovdanbuktá ge buot mii sus aiddo dalle lea váimmus.

Girječálli Ingá Rávna Eira lohká lean miellagiddevažžan gullat Märak, ja erenoamážin lohká lean su vuogi mo ovdanbuvttii iežas poesiija.

Seamma lohká maid Álttá joatkkaskuvlla oahppi Dina Skotnes Johnsen ja Guovdageainnu joatkkaskuvlla oahppi Mina Kristina Hætta.