NRK Meny
Normal

Lassi oahppočuoggáid sámegillii

Lassi oahppočuoggát sáhttet hástit eanet ohppiid lohkat sámegiela skuvllas oaivvilda sámediggeáirras.

Miriam Paulsen

Sámediggeáirras Miriam Paulsen lea bargan maid sámegielat mánáidgárdefálaldagain.

Foto: Harrrieth Aira / NRK

NSR sámediggeáirras Miriam Paulsen háliida hásttuhit eanet nuoraid lohkat sámegiela skuvllas. Norgga oahpahusministtar Kristin Halvorsen lea evttohan, ahte oahppit, geat lohket ođđa dárogiela, galget oažžut lassi oahppočuoggáid. Paulsen gáibida, ahte maid sámegielaoahppit oččošedje daid.

- Dát sáhtašii guoskat maid sámegiela, jáhkkimis oahppit logadivčče eanet sámegiela, jus das oččošii lassičuoggáid, dadjá Paulsen.

Norgga sámiid riikasearvvi sámediggeáirras Miriam Paulsen lohka, ahte lassi oahppočuoggát sáhttet hásttuhit eanet ohppiid lohkat sámegiela skuvllas.
Sámedikki gielladieđáhusas boahtá ovdan, ahte ollu oahppit eai vuorut sámegiela, go lea heivehuvvon nu funet oahpahusplánii.

Sáhttet dovdat sámegiela noađđin


Paulsen maid dovddaha, ahte ollugat dađi bahát hilgot sámegielaoahpahusa, go dat čuohcá eará fágaide, dahje astoáiggi doaimmaide. Muhto dat evttohus sáhtašii leat čoavddus, lohká son.

Norgga Oahpahusministtar Kristin Halvorsen dat lea evttohan, ahte oahppit, geat lohket ođđa dárogiela galget oažžut lassičuoggá. Mii eat leat ožžon Halvorsena sagaide gullan dihte, jus dat evttohus sáhtašii fátmmastit maid sámegiela.

Muhto sámediggeáirras Miriam Paulsena mielas gal galggašii ráđđehus maid seammás geahččat vejolašvuođaid sámegiela ektui.


GULDAL: